Հայաստանում վերջին իրադարձություններն ապացուցում են հենց իրական ընդդիմության անհրաժեշտությունը մեր քաղաքական ներկապնակում։
Որքանո՞վ է հրատապ այդ իրական ընդդիմության ձևավորումը Հայաստանում․ «Առաջին լրատվական»-ի հարցին քաղաքագետ Ռուբեն Մեհրաբյանը պատասխանեց․ «Նախ ասեմ, որ հրատապությունը, այսպես ասած, հրամայականի կարևորություն ունի, և այդ իմաստով մենք տեսնում ենք, որ ընդդիմության սեգմենտն այդ ներկապնակում պարզապես իր ֆունկցիայի մեջ չէ։ Եվ տեղը զբաղեցնելով, ամենևին էլ չի արդարացնում այն սպասելիքները, որոնք կան այդ ընդդիմությունից։ Ընդդիմության անելիքն այն է, որ իշխանության համար լինի հակակշիռ, իշխանության նկատմամբ լինի և՛ վերահսկիչ, և՛ նոր գաղափարների գեներատորի դերում։ Բայց մենք տեսնում ենք, որ այդ բանը չկա, մենք տեսնում ենք, որ այդ ամենը չի անցնում ճղճիմ խոսակցությունների դաշտից դուրս։ Արդյունքում էլ մենք տեսնում ենք, որ կա միայն աղմուկ, քիչ է այդ բախման հետևանքով առաջացած արդյունքը, որը մենք ակնկալում ենք։ Մենք նաև տեսնում ենք, որ գնալով կարող է շատ ու շատ գայթակղություններ առաջանալ, և բոլորը չէ, որ կարող են այդ գայթակղությանը չտրվել։ Դրանից որևէ մեկն ապահովագրված չէ։ Դրա երաշխիքը կարող է լինել միայն այն, որ այն, ինչին մեր պետությունը հասել է, պետք է ինստիտուցիոնալացվի։ Իսկ այդ ինստիտուտները ծնվելու են հենց գաղափարների բախման արդյունքում։ Մենք դա, ցավոք սրտի, չենք տեսնում»։
Իսկ քաղաքագետ Ռոբերտ Ղևոնդյանն էլ ասաց․ «Ես կհամաձայնվեմ գործընկերոջս հետ։ Այսօր մեն ունենք դաշտ, որտեղ կա մեկ ուժ, որն ունի հասարակության բացարձակ աջակցությունը, և կա մի շատ փոքր խումբ, որը ցանկացած հարցում, ցանկացած կերպ ընդդիմանում է իշխանությանը։ Սակայն չունի սոցիալական կապիտալ, որը կարող է հնարավորություն տալ քաղաքական դաշտում դերակատար դառնալու։ Դասական, քաղաքագիտական իմաստով ընդդիմությունը հասարակության այնպիսի մի շերտ է, որը չունի մեծամասնություն որոշումներն ինքնուրույն իրականացնելու համար, սակայն ընդդիմանում է մեծամասնության կայացրած որոշումներին և ունի սեփական օրակարգը։ Այսօր այն հատվածը, որն իրեն ընդդիմություն է ներկայացնում, ճիշտ է, ունի ռեսուրսներ, սակայն սոցիալական կապիտալ չունի, որպեսզի կարողանա օրակարգ թելադրել կամ օրակարգի վրա որոշակի ազդեցություն ունենալ»։
Մանրամասները՝ տեսանյութում։