Անցյալ շաբաթ Ազգային ժողովն ընդունեց «Հայաստանի Հանրապետության 2020 թվականի պետական բյուջեի մասին» օրենքի նախագիծը։
Ազգային ժողովի մեծամասնությունն այն ներկայացնում է որպես ձեռքբերում, առաջընթաց ապահովվող, հեղափոխական, իսկ ընդդիմությունը գտնում է, որ այս բյուջեում հեղափոխական որևէ բան չկա։ Դուք ինչպե՞ս եք գնահատում․ «Առաջին լրատվական»-ի հարցին տնտեսագետ, «Տնտեսական իրավունքի կենտրոն» հ/կ նախագահ Մովսես Արիստակեսյանը պատասխանեց․ «Ինչպես միշտ արտահայտվել եմ, այս անգամ էլ ասեմ, որ այս բյուջեն բնույթով զգուշավոր է և սպասողական։ Իհարկե, թե՛ եկամուտների, թե՛ ծախսերի առումով առաջընթաց կա նախորդ տարիների բյուջեների համեմատ, բայց դա բոլորովին որակական գնահատական չէ, թե ինչ պետք է կատարվի, որովհետև բյուջետային ուղերձում՝ հիմնվելով կառավարության ծրագրերի վրա, չկա որևէ ռազմավարական ծրագրերի հիմնավորվածություն։ Օրինակ՝ կառավարության ծրագիրն ընդունելու ժամանակ ասացին, որ բոլոր նախարարությունները կսկսեն մշակել իրենց ոլորտային ռազմավարությունները, սակայն այդպես չէ։ Ընդհանրապես, բյուջեի կազմավորման ժամանակ մենք չենք տեսնում տնտեսության զարգացմանն ուղղված ռազմավարական տեսլականներ, նպատակներ, որոնք կլրացնեն բյուջեն»։
Իսկ տնտեսագետ Ատոմ Մարկոսյանն ասաց․ «Քաղաքական այն ուժը, որն այսօր թամբին է՝ իշխող է, պետք է թրենդի մեջ պահի որակումները։ Այսինքն՝ հեղափոխական պետք է լինի, իհարկե։ Կա այդտեղ ճշմարտության տառ, անկասկած։ Իսկ ընդդիմության համար պետք է հակառակը լինի՝ ոչինչ չասող, համեստ, իրավիճակին ոչ ադեկվատ։ Եթե մասնագիտական չեզոք աչքով նայենք, ապա սա առաջքայլ է այն իմաստով, որ բյուջետային ծախսերը որոշակիորեն աճել են։ Բայց ինձ համար տարօրինակ էր այս ֆինալային փուլը, երբ վերջում բավական երկար քննարկվեց նախագիծը, ի վերջո, ծախսերի գծով եղավ նվազում։ Ընդ որում, հիմնավորումները, որ բերում է կաբինետը, կարելի է ասել՝ ինչ-որ տեղ տրամաբանական են։ Ի վերջո պետք է հասկանանք, որ արտահանումների խնդիր ունեցող երկրում դրամը չի կարող երկար ժամանակ կայուն լինել։ Այնպես որ, սպասվում է, որ դրամը հաջորդ տարի կթուլանա»։
Մանրամասները՝ տեսանյութում։
