Սամոայում կարմրուկի համաճարակի հետևանքով մահացածների թիվը հասել է 70-ի: Այդ մասին դեկտեմբերի 9-ին հայտնել է երկրի կառավարությունը Twitter-ի իր պաշտոնական էջում: «Բռնկման պահից (2019 թվականի հոկտեմբերի կեսից) գրանցվել է կարմրուկով հիվանդանալու 4 հազաց 693 դեպք, որոնցից 112-ը՝ վերջին 24 ժամվա ընթացքում: Այսօրվա դրությամբ 70 մարդ է մահացել այդ հիվանդությունից»,- նշվում է կառավարության հաղորդագրության մեջ: Առողջապահության նախարարության տվյալներով՝ 70 մահացածներից 61-ը մինչև չորս տարեկան երեխաներ են:
Նաև հաղորդվում է, որ ներկայում հոսպիտալացված է շուրջ 160 մարդ, այդ թվում՝ 16 ծանր հիվանդ երեխաներ, որոնք գտնվում են վերակենդանացման բաժանմունքում: Նախօրյակին Սամոայի կառավարությունը հայտարարել է, որ կարմրուկի դեմ բնակչության իմունիզացիայի երկօրյա արշավի ընթացքում, որն անցկացվել է դեկտեմբերի 5-ին և 6-ին, հաջողվել է պատվաստումներ անել երկրի բնակչության մոավորապես 40 տոկոսին և պատվաստումների ընդհանուր ցուցանիշը հասցնել 90 տոկոսի:
Ինչպես արդեն տեղեկացվել է, երկրում հայտարարվել է կարանտին և արտակարգ դրություն, փակ են դպրոցները և մանկական նախադպրոցական հաստատությունները: Բուժանձնակազմ և կարմրուկի դեմ պատվաստանյութեր են տրամադրվել Ավստրալիայից, Նոր Զելանդիայից, Մեծ Բրիտանիայից, Ֆրանսիայից, Չինաստանից, Նորվեգիայից, Ճապոնիայից, ԱՄՆ-ից և Ֆրանսիական Պոլինեզիայից:
