Պարտադիր կուտակային կենսաթոշակային համակարգի դեմ պայքարող «Դ!եմ եմ» նախաձեռնությունը մայրաքաղաքի վարչական շրջաններում իրազեկման ակցիաներ է սկսում, որոնց մեկնարկն ապրիլի 21-ին տրվեց Քանաքեռ-Զեյթուն վարչական շրջանում:
Նախաձեռնության անդամները տեղեկացնում էին բնակիչներին, որ այլևս իրենց աշխատավարձից որևէ պահում կատարելու իրավունք չունեն, հիշեցնում, որ այժմ 70-80 գործատու որևէ պահում չեն կատարում իրենց աշխատողների աշխատավարձերից, քանի որ ՍԴ որոշման վեցերորդ կետի համաձայն՝ աշխատողների կամքին հակառակ որևէ պահում չեն կարող անել:
«Կոչ ենք անում թույլ չտալ որևէ հիմնարկում պահումներ կատարել. ոչ մի լծակ չունի իշխանությունը, եթե դուք բոլորով միահամուռ որոշեք պայքարել, ոչ մեկը չի կարող ձեզ գործից հանել»,- հայտարարում էին ակցիայի մասնակիցները:
Պատուհաններից, բակերում, խանութներից ակցիայի մասնակիցներին էին միանում, կուտակային համակարգից իրնց դժգոհությունն էին հայտնում պատահական անցորդներ, բնակիչներ: «Ես իմ երեխեքի ապագան ստեղ չեմ տեսնում, եթե սենց լինի, հենց էսօր էլ, հնարավորություն ունենամ, կհանեմ ստեղից»,- ասաց հացաբուլկեղենի խանութի աշխատակցուհին, որը նշեց, որ այս օրենքի կիրառման հետևանքով իրենց ընտանեկան բյուջեն զգալիորեն նվազել է: «Եթե էս թույլ տան, ուրեմն սաղս պիտի յուբկա հանգնենք, ֆռֆռանք»,- ակցիայի մասնակիցների հետ զրույցում նշեց մի երիտասարդ:
Նախաձեռնության անդամ Հայկ Ավետիսյանը, լրագրողների հետ ճեպազրույցում անդրադառնալով հարցին` արդյոք հույսեր կապո՞ւմ են նոր կառավարության հետ, կարո՞ղ է փոխվել նախորդ վարչապետի ընտրած կուրսը, ասաց. «Հույս միշտ էլ կա, մենք կարծում ենք` ամենակարևոր խնդիրն այն է, որ ՀՀ-ում մարդկանց մոտ պայքարի ոգին չմարի. դա է ամենակարևոր խնդիրը:
Մենք մեր հույսը չենք դնում ինչ-որ իշխանության ներկայացուցչի կամ որևէ այլ անձի խոստման վրա: Ասում են՝ քննարկումներ ունենանք: Լավ, քննարկենք, մենք համաձայն ենք, բայց ի՞նչ: Պատրաստակամություն ունենք, քննարկենք, բայց ի՞նչ: ՍԴ որոշման մեկնաբանությունը քննարկման ենթակա չէ, պարտադիրը լավ է, վատ է, պիտի պահվի, չպահվի՝ նույնպես քննարկման ենթակա չէ: Եթե այդ ամենը հանեն, այլ օրինագիծ առաջարկեն, դա, կարծում եմ, կարելի է քննարկել»,- ասաց նա:
Առաջիկա օրերին դեմեմցիները պատրաստվում են նմանատիպ իրազեկման ակցիաներ անցկացնել նաև մյուս վարչական շրջաններում:
Մանրամասները` տեսանյութում:
