Ռուսական զորքերը մտել են սիրիական Ռաքա քաղաք, որը համարվում է «Իսլամական պետություն» ահաբեկչական խմբավորման նախկին մայրաքաղաք: РИА Новости-ի տեղեկություններով, զինվորականները մարդասիրական օգնություն են հանձնել քաղաքի բնակիչներին: Ռաքա են ժամանել նաև զինվորական բժիշկներ:
Գործակալության տվյալներով, քաղաքի ազատագրման ընթացքում ենթակառուցվածքն ամբողջությամբ ոչնչացվել է: Քաղաքում դեռ ավարտված չեն ականազերծման աշխատանքները, կա մաքուր ջրի, դեղորայքի և սննդի պակաս:
Հիշեցնենք, որ ահաբեկիչները գրավել էին Ռաքան 2013թ-ի գարնանը՝ հռչակելով այն Իսլամական պետության մայրաքաղաք, ինչի արդյունքում քաղաքը լքել էր 250 հազար բնակիչ: 2019-ի հոկտեմբերին սիրիական բանակը մտավ Ռաքա: