Կալիֆոռնիայի համալսարանի և Սոլկի հետազոտական ինստիտուտի ամերիկացի գիտնականները խորհուրդ են տալիս սնվել տասը ժամվա ընթացքում, իսկ մնացած 14 ժամը ծոմ պահել: Ուսումնասիրությունը հրապարակել է Cell Metabolism պորտալը:
Ըստ բժիշկների, դա կօգնի նիհարել և բարելավել ինքնազգացողությունը:
Հետազոտությանը մասնակցել է 19 մարդ. 13 տղամարդ և 6 կին: Նրանց մոտ առկա էր նյութափոխանակության խանգարում, որն արտահայտվում էր մետաբոլիզմի դանդաղեցմամբ: Մետաբոլիկ համախտանիշն ի հայտ է գալիս նրանց մոտ, ովքեր անառողջ ապրելակերպ են վարում և չարաշահում են արագ սնունդը:
Փորձի մասնակիցները, ըստ հանձնարարականի, պետք է սնվեին միայն տասը ժամվա ընթացքում, իսկ օգտագործած սնունդը գրանցեին հատուկ հավելվածում: Նրանք նաև իրենց ֆիզիկական ակտիվության վերաբերյալ նշումներ պետք է անեին:
12 շաբաթ անց փորձի մասնակիցների խոլեստերինի մակարդակը նվազել է 11%-ով, իսկ արյան ճնշումը՝ չորսից ութ կետով: Բացի այդ, նրանց քաշը նվազել է մոտավորապես երեք կիլոգրամով: Փորձի մասնակիցներից ոմանք նկատել են քնի որակի բարելավում: