Լուրեր
Մեր քաղաքական դաշտը նման է «ռեալիթի շոու»-ի

Վերջին մեկուկես տարիներին հայաստանյան զարգացումները՝ ներքաղաքական, հասարակական և մի շարք ուղղություններով, բավականին լուրջ փոփոխությունների են ենթարկվել: Մի կողմից նշում են, որ վերելք է ապրել ատելության խոսքը, սոցցանցերում շատացել է հայհոյախոսությունը, մյուս կողմից նշում են, որ բավականին լուրջ դրական տեղաշարժեր կան: Ի՞նչ ունեինք երեկ և ի՞նչ ունեինք այսօր:

Թեմայի շուրջ «Առաջին լրատվական»-ի հետ զրույցում Կարեն Անտաշյանը նշեց. «Եթե այս ամեն ինչին նայենք գրականության տեսանկյունից, հեղափոխությունը կամ այդ քաղաքական-հասարակական գործընթացը, որ սկսվեց Հայաստանում, ուշադրության բոլոր բևեռները սևեռեց իր վրա և շարունակում է սևեռած պահել: Որևէ ստեղծագործություն գիրք, ֆիլմ կամ ներկայացում, դատապարտված էր անուշադրության, որովհետև կար համար մեկ հարթակը տեղեկատվություն փոխանցելու և հանրային դիսկուրս հրահրելու՝ դա վարչապետի ֆեյսբուքյան էջն էր, հետո արդեն ձևավորված կառավարության և Ազգային ժողովի նիստերը: Քիչ-քիչ սկսում է նահանջել սևեռվածությունը գերքաղաքականացվածության վրա:

Ամեն դեպքում արդեն իսկ տեղի են ունենում բաներ, որոնք գնահատականների են արժանանում հասարակության կողմից և դա հանգեցնում է միատարր սևեռվածության վերանայմանը: Արդեն կա քննարկում, կա դիսկուրս, բայց դա ոչ թե ուղղակի ժողովրդավարության դրսևորում է, ոչ թե համակարգի արդիականացմանը, օպտիմիզացմանն ուղղված անհրաժեշտ քննարկում է կողմ և դեմ կողմերի միջև, այլ հանդիսատեսի մեկնաբանություն է:

Ցավոք մեր քաղաքական դաշտը, որ այդքան մեծ ուշադրություն է սևեռել իր վրա, այսօր ավելի շատ գոյություն ունի իբրև ռեալիթի շոու, որը խնդիր ունի ուշադրություն սևեռելու և պահելու իր վրա և ընտրողներին ու հասարակության բոլոր խմբերին դիտարկելու իբրև հանդիստատես, քան թե խնդիր ունի այդ բոլոր կողմերի ներգրավմամբ ստեղծելու իրական հանրային արդյունքի գեներացիա՝ համակարգերի բարեփոխման տեսքով»:

«Կարող են փոխվել քաղաքական հարաբերությունները կամ քաղաքականության մասնակիցները, բայց ընդհանուր առմամբ մարդկանց կյանքը կտրուկ չի փոխվում, որովհետև մտածողության փոփոխությունը դժվար գործընթաց է՝ հաճախ սերունդներ պահանջող գործընթաց»,- նշեց գրողը՝ հավելելով, որ մշակութային հեղափոխությունը հենց դա է ենթադրում:

Մանրամասն՝ տեսանյութում:

  • Դիտումներ՝ *