Բրիտանացի դեռահասը, որն այս տարվա օգոստոսին փոքրահասակ երեխային ցած է նետել Tate Modern պատկերասրահի դիտման հարթակից, իրեն մեղավոր է ճանաչել սպանության փորձի մեջ, դատարանին իր գործողությունները բացատրելով հայտնի դառնալու ցանկությամբ:
Ջոնթի Բրեյվին ձերբակալվել է անմիջապես այն բանից հետո, երբ վեց տարեկան տղան հինգերորդ հարկի մակարդակի դիտման հարթակից ընկել է ներքևի պատշգամբի վրա: Մինչ ոստիկանության ժամանելը, նրան կանգնեցրել են թանգարանի այցելուները, որոնց աչքի առաջ տեղի է ունեցել հանցագործությունը:
Վեցամյա տղան ընտանիքի հետ Լոնդոն էր ժամանել Ֆրանսիայից: Երեխային ծանր վնասվածքներով տեղափոխել են հիվանդանոցի վերակենդանացման բաժանմունք: Նա ներգանգային արնազեղում և ողնաշարի վնասվածք է ստացել և մինչ այժմ դժվարությամբ է տեղաշարժվում:
Օլդ Բեյլիում դատավարության ժամանակ ամբաստանյալը հայտարարել է, որ մտադրվել էր սպանություն իրականացնել՝ հեռուստատեսությամբ լուրերում հայտնվելու համար, և զոհին պատահականության սկզբունքով է ընտրել:
Դատավճիռը կհրապարակվի փետրվարին: