Լոնդոնի կենտրոնում գտնվող Տրաֆալգարյան հրապարակում վառ լույսերով է շողացել Մեծ Բրիտանիայի գլխավոր եղեւնին: Լուսավառության արարողությանը ելույթ է ունեցել Վեսթմինսթերի մայրաքաղաքային շրջանի լորդ-քաղաքագլուխ Ռութ Բուշը և Օսլոյի քաղաքագլուխ Մարիանե Բորգենը: «Փրկության բանակ» բարեգործական կազմակերպության նվագախմբի հնչյունների ներքո նրանք տվել են Մեծ Բրիտանիայի մայրաքաղաքում «Սուրբծննդյան սեզոնի» մեկնարկի ազդանշանը:
Ավանդույթի համաձայն, 24-մետրանոց եղևնին Լոնդոն է հասցվել Նորվեգիայից: Ծովով փոխադրելիս ծառը փոքր ինչ կորցրել է երբեմնի ճոխությունը, ինչը չեն հապաղել նշել տեղական ԶԼՄ-ներն ու մայրաքաղաքի բնակիչները:
Սոցիալական ցանցերում արդեն սարկաստիկ դիտողություններ են հայտնվել եղեևնու «լղարության» վերաբերյալ, իսկ առանձին արձագանքների հեղինակներ նույնիսկ «խաղաղությամբ հանգչել» են մաղթել Սուրբծննդյան ծառին:
Տրաֆալգարյան հրապարակը Նորվեգիայից բերված եղևնիով զարդարելու ավանդույթը սկիզբ է առել 1947 թվականին: Նորվեգացիներն այդ կերպ իրենց երախտագիտությունն են հայտնում Երկրորդ համաշխարհային պատերազմի ժամանակ բրիտանացիների կողմից իրենց ցուցաբերված օգնության համար:
Նացիստական օկուպացման տարիներին Նորվեգիայի թագավորական ընտանիքը և երկրի կառավարությունը ապաստան էին գտել Լոնդոնում: Մեծ Բրիտանիայում էին պատրաստվում նաև նորվեգական դիմադրության մարտիկների ջոկատները, մշակվում էին նացիստների դեմ դիվերսիոն գործողությունների պլաններ: Սուրբծննյան եղևնին Տրաֆալգարյան հրապարակում կանգնած կմնա մինչև հունվարի սկիզբը, հաղորդել է ՏԱՍՍ-ը: