«Հայաստանի հանրապետական» կուսակցության փոխնախագահ Արմեն Աշոտյանն այսօր հայտարարել է, որ ՀՀ երկրորդ նախագահ Ռոբերտ Քոչարյանի և ՀՀ երրորդ նախագահ Սարժ Սարգսյանի նկատմամբ հարուցված գործերը ՀՀԿ-ն շաղկապում է արտաքին և ներքին քաղաքական խմորումների ու զարգացումների հետ։
«Ավելի մանրամասն ուսումնասիրելով մեղադրանքի իրավական հղումները կամ հղումները, որոնք փորձել են իրավական փաթեթավորում տալ բացառապես քաղաքական գործընթացին, գալիս ենք հետևյալ եզրակացության. հիշո՞ւմ եք Ռեբերտ Քոչարյանի հարուցված քրեական գործի շրջանակներում հայտնի հեռոսազրույցի արտահոսքը, որտեղ իշխանավորները պնդում են և ասում, որ Քոչարյանի նկատմամբ գործը ջուր է։ Եթե գնանք այս տրամաբանությամբ և դիտարկենք Պլատոնի կողմից նկարագրված 4 էլեմենտները, ապա եթե Քոչարյանի նկատամբ հարուցված քրեական գործը ջուր է, ապա Սերժ Սարգսյանի նկատմամբ հարուցվածն օդ է»,-այս մասին այսօր հրավիրված ասուլիսում ասաց Արմեն Աշոտյանը։ Նա հայտարարեց, որ անհամբեր սպասելու են պատմության դատին հասկանալու համար, թե ում նկատմամբ հարուցված քրեական գործը կրակ ու հող կլինի։