«Առաջին լրատվական»-ին նոր մանրամասներ են հայտնի դարձել երեկ Ազգային անվտանգության ծառայության կողմից խոշոր ճափի կաշառք վերցնելու գործով բերման ենթարկված ԿԳՄՍ նախարարի տեղակալ Գևորգ Լոռեցյանի գործից։
Նշենք, որ քրեական գործի շրջանակներում արդեն կա երեք ձերբակալված անձ։ ԱԱԾ-ն տեղեկացրել էր, որ քրեական գործի շրջանակներում Կրթության գիտության մշակույթի և սպորտի փոխնախարար Գևորգ Լոռեցյանը, նրա վարորդը և հայկական ֆուտբոլային ակումբներից մեկի նախագահը ձերբակալված են:
Մեր տեղեկություններով ձերբակալվածներից մեկը Երևանի «Լոկոմոտիվ» ֆուտբոլային ակումբի հիմնադիր և սեփականատեր Հրաչ Քանանյանն է։
Մեզ հասած տեղեկություններով հենց Քանանյանն է տարիներ շարունակ զբաղվել Սպորտի նախարարության ենթակայության տակ գտնվող մարզաձևերի, սպորտային այլ կառույցների մարզագույքի և մարզահագուստի մատակարարմամբ։ Տարիներ շարունակ հենց նա է այդ տենդեռները շահել հայտնի մեխանիզմներով։
Հեղափոխությունից հետո, Քանանյանը որոշել է, որ պետք է շարունակի այդ ոլորտում իր մենաշնորհային գործունեւոյթունը և փոխնախարար Գևորգ Լոռեցյանին առաջարկել է 1 միլիոն դրամ կաշառքի դիմաց այնպես անել, որպեսզի այդ տենդեռում նորից ինքը հաղթի ու նորից ինքը զբաղվի սպորտային գույքի ու մարզահագուստի մատակարարմամբ։ Լոռեցյանն էլ համաձայնել է և պայմանավորված գումարի 300 հազար դրամը Լոռեցյանի վարորդի միջոցով փոխանցման պահին էլ ձերբակալվել են բոլորը։
Ի դեպ, Հրաչիկ Քանանյանը համարվում է ԲՀԿ առաջնորդ Գագիկ Ծառուկյանի մտերիմ շրջապատից։ Նա հանդիսանում է նաև իտալական Givova ապրանքանիշի միակ ներկրողը Հայասանում։
Հիշեցնենք, որ երեկ ԱԱԾ-ն տեղեկացրեց, որ Հայաստանի Հանրապետության ազգային անվտանգության ծառայության աշխատակիցների կողմից, կոռուպցիայի դեմ պայքարին ուղղված գործառույթների իրականացման շրջանակներում ձեռնարկված մեծածավալ օպերատիվ-հետախուզական միջոցառումների արդյունքում, 2019թ. դեկտեմբերի 4-ին, առանձնապես խոշոր չափերով կաշառք ստանալու կասկածանքով, բերման է ենթարկվել ՀՀ կրթության, գիտության, մշակույթի և սպորտի նախարարի տեղակալը, ինչպես նաև վերջինիս վարորդն ու ՀՀ-ում գործող ֆուտբոլային ակումբներից մեկի նախագահը, ով միաժամանակ հանդիսանում է նաև մի շարք մատակարարող ընկերությունների փաստացի ղեկավարը: Ձեռք բերված նախնական տվյալների համաձայն՝ ՀՀ ԿԳՄՍ նախարարի տեղակալը, նախարարության ենթակա հիմնարկների կարիքների համար մարզագույքի և մարզահագուստի ձեռքբերման նպատակով հայտարարված մրցույթներում աջակցություն ցուցաբերելով վերոնշյալ տնտեսվարողին, դրա դիմաց վարորդի օժանդակությամբ պայմանավորվածություն է ձեռք բերել ստանալ առանձնապես խոշոր չափերով կաշառք գումար: