Коммерсантъ ռուսական պարբերականը անդրադարձել է Հայաստանի նախկին նախագահ Սերժ Սարգսյանի դեմ քրեական գործին:
Պարբերականը մասնավորապես նշում է, որ ի տարբերություն մյուս նախկին նախագահի՝ Ռոբերտ Քոչարյանի՝ սա ոչ թե քաղաքական, այլ տնտեսական մեղադրանք է. Սարգսյանը մեղադրվում է պետբյուջեի գումարները յուրացնելու մեջ:
ՀՔԾ-ից Коммерсантъ-ին հայտնել են, որ 2013 թ. հունվարի 25-ից մինչև փետրվարի 7-ը, երբ երկրում հողօգտագործման աջակցության ծրագրի շրջանակում դիզելային վառելիքի մատակարարման տենդեր էր հայտաարարվել, Սարգսյանը կարգադրել է նախապատվությունը տալ «Ֆլեշ» ընկերությանը, մինչդեռ ամենացածր գինը առաջարկել է մեկ այլ ընկերություն` «Մաքսուր»-ը։ Դրանով պետությանը հասցվել է 489 160 310 դրամի վնաս:
Հղում անելով հայկական ԶԼՄ-ներին՝ պարբերականը գրում է, որ «Ֆլեշ» ընկերության սեփականատեր Բարսեղ Բեգլարյանը Սերժ Սարգսյանի մոտ ընկերն է: Որպես խափանման միջոց կիրառվել է չհեռանալու մասին ստորագրությունը։
Коммерсантъ-ը նշում է, որ նախկին նախագահի գլխավորած կուսակցության ներկայացուցիչները հրաժարվել են Սերժ Սարգսյանի նկատմամբ մեղադրանքը մեկնաբանելուց՝ նշելով, որ շուտով կուսակցությունը հանդես կգա հայտարարությամբ:
Պարբերականը խոսել է նաև Կովկասի ինստիտուտի տնօրեն Ալեքսանդր Իսկանդարյանի հետ, որի կարծիքով, այս քրեական գործը պայմանավորված չէ Սարգսյանի՝ ՀՀ վարչապետ Նիկոլ Փաշինյանի հասցեին հնչեցրած քննադատությամբ:
