Նախկին նախագահ Սերժ Սարգսյանին այսօր մեղադրանք է առաջադրվել ՀՀ Քրեական օրենսգրքի 38-179-րդ հոդվածի 3-րդ մասի 1-ին կետով (խոշոր չափով յուրացում) նախատեսված հանրորեն վտանգավոր արարքի մեջ: Սերժ Սարգսյանի նկատմամբ որպես խափանման միջոց է ընտրվել չհեռանալու մասին ստորագրությունը:
Թեմայի շուրջ «Առաջին լրատվական»-ի հետ քննարկմանը մասնակցեցին «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը, «Անտարես» հրատարակչության տնօրեն Արմեն Մարտիրոսյանը և «Քաղաքացու որոշում» կուսակցության անդամ Նարեկ Ներսիսյանը:
«Մեկ միլոն դոլար հափշտակելը, անշուշտ, ծանր հանցագործություն է, բայց եթե փորձենք գնահատել, թե որքան գումար է հափշտակվել, մսխվել Սերժ Սարգսյանի պաշտոնավարման տարիներին՝ 2008-2018թթ, կտեսնենք, որ մեկ միլիոնը դրա ընդամենը մի փոքր մասն է… Այդ հափշտակումը հնարավոր է դարձել այն պատճառով, որ պետությունը եղել է զավթված, պետական ինստիտուտները, դատական համակարգը եղել է նրա գրպանում…
Մյուս կողմից, ի տարբերություն Ռ. Քոչարյանի, Սերժ Սարգսյանի արարքներում արյուն չկա, նրա ձեռքերը կարծես թե առանձնապես արյունոտ չեն, նա տանկեր չի հանել ժողովրդի դեմ»,- նշեց Դանիել Իոաննիսյանը՝ հավելելով, որ Ս. Սարգսյանի համար իրեն մեղադրանք առաջադրելը սպասելի էր:
Արմեն Մարտիրոսյանը հավելեց, որ Սերժ Սարգսյանի նկատմամբ մեղադրանք առաջադրելը անակնկալ էր, բայց. «Նիկոլն ասել է, որ կոպեկ առ կոպեկ հետ են բերելու…»:
«Հայաստանը տարիներ շարունակ գազանաբար թալանվել է, և բոլոր նրանք, ովքեր թալանել են, այսուհետ չեն քնելու, կարծում եմ, ԱԱԾ-ն ավելի աչալուրջ կլինի և բաց չի թողնի «խոշոր գայլերին»»,- նշեց Ա. Մարտիրոսյանը:
Նարեկ Ներսիսյանի դիտարկմամբ՝ խնդիրը խորքային է. «30 տարի մեր կյանքից հենց այնպես նվեր ենք տվել, ժողովրդավարություն չենք կառուցել, ժողովուրդն անընդհատ կեղեքվել է և բռնել արտագաղթի ճանապարհը, որի հիմնական պատճառը եղել է այն, որ մեր երկրում նախևառաջ արդարադատություն չի եղել: Եթե քեզ պետք է այսօր պաշտպանեին՝ անմեղության կանխավարկածից ելնելով, և չեն պաշտպանում, ուրեմն ինչ ցանել ես, այն էլ հնձում ես»:
ՀՀԿ-ն հայտարարություն է տարածել, որում որպես քաղաքական հետապնդում է դիտարկվել երրորդ նախագահի նկատմամբ մեղադրանք առաջադրելը: Դանիել Իոաննիսյանն անդրադառնալով այս դիտարկմանը նկատեց, որ հիմա ամեն երկրորդ քրեական հետապնդման ենթարկվող անձը փորձում է քաղբանտարկյալ դառնալ, հույսով, որ այդ կերպ իր ազատության համար պայքարն արդյունավետ կլինի. «Բայց այդ մարդիկ չեն հասկանում, որ ՀՀ-ում քաղբանտարկյալ չկա: Իսկ նախկինում միջազգային հանրությունը հենց իրենց՝ նախկին իշխանություններին, պարտադրում էր ազատ արձակել քաղբանտարկյալներին, իսկ հիմա ոչ ոք Նիկոլ Փաշինյանի կառավարությանը չի ճնշելու, որովհետև ակնհայտ է, որ Հայաստանում քաղբանտարկյալ չկա»:
Մանրամասն տեսանյութում: