Նախօրեին ԱԺ-ում քննարկվում էր «Պետական տուրքի մասին» ՀՀ օրենքում լրացում կատարելու նախագիծը։ Կառավարությունը նոր օրենսդրական նախաձեռնությամբ ցանկանում է աշխարհի ցանկացած նոր ուղղությամբ թռիչքներ սկսող ավիաընկերություններին ազատել օդի 10 հազար դրամ տուրքից՝ առաջին թռիչքի մեկնարկից սկսած և միայն տվյալ ուղղության համար։
«Խթանում ենք նոր ուղղություններ, որոնք չեն սպասարկվել վերջին 12 ամիսների ընթացքում։ Այս պայմանները դրել ենք, որպեսզի ռիսկերը վերացնենք, որպեսզի այսօրվա գործող ավիաընկերությունները իրենց արդեն իսկ սպասարկող ուղղությունները չփակեն ժամանակավոր և չդիմեն այս արտոնությանը։ Միաժամանակ պահանջում ենք ավիաընկերությունից, որ արտոնություն ստանալուց իրականացնեն իրենց չվերթերն ամբողջ տարվա ընթացքում»,- հայտարարել է ՀՀ քաղավիացիայի կոմիտեի նախագահ Տաթևիկ Ռևազյանը։
ՀՀ քաղավիացիայի վարչության նախկին պետ Շահեն Պետրոսյանը կարծում է, որ այդ տուրքն ընդհանրապես պետք է վերացվի, քանի որ դա գանձվում է ուղևորից, ոչ թե ավիաընկերությունից։
Շահեն Պետրոսյանը հիշեցնում է, որ պետական տուրքը մտցրեց Ռոբերտ Քոչարյանը 1998 թվականից, երբ մենք ունեինք սեփական ավիափոխադրող։
«Էն գլխից սխալ էր դա։ Հիմա պետբյուջեում նախատեսված է այդ գումարն ինչ-որ չափով։ Հրաժարվել անմիջապես՝ անհնար է։ Դրա համար էլ կառավարությունը ձև է մտածել։ Այդ նոր ընկերությունների համար, որոնք պետք է թռիչք իրականացնեն, պետք է զեղչ գործի։ Բայց ինչո՞ւ պետք է դա լինի օտարների համար, ոչ թե սեփականի, այսինքն՝ որոշել են, որ պետք է սեփական ընկերությունների հերն անիծե՞ն»,- հարցնում է Շահեն Պետրոսյանը։
ՀՀ քաղավիացիայի վարչության նախկին պետը հիշում է, որ «Հայկական ավիաուղիները» կազմալուծվեց 2002 թվականին, սակայն գործընթացը սկսվել էր 1998 թվականից, երբ սկսվեց արհեստական սնանկացումը։ Այդ ժամանակ էլ, ըստ մեր զրուցակցի, մտցրել են օդի տուրքը։
«Հիմա իրենք ինչ-որ ֆոկուս են անում, թե կամաց-կամաց տուրքը կհանեն։ Այդ ամենը արվում է Ryanair ընկերության համար, որպեսզի նրա մուտքն արդարացվի Հայաստան։ Թե ինչքանով է դա իրական՝ հետո կերևա։ Երբ Ryanair-ը կթռչի, ստույգ կիմանանք, թե ինչ գներ են գործում, այն ժամանակ էլ կկարողանանք ըստ էության խոսել»,- ասաց Շահեն Պետրոսյանը։
