ՀՀ ԱԺ պետական-իրավական հանձնաժողովը, որի նախագահը և մեծամասնությունը իշխանության ներկայացուցիչներ են, բացասական եզրակացություն է տվել ԱԱԾ տնօրենի և ոստիկանության պետի պաշտոնները քաղաքական դարձնելու մասին օրինագծերին։
«Սասնա ծռեր» համահայկական կուսակցության քարտուղարությունը այս հարցի շուրջ հայտարարություն է տարածել՝ մասնավորապես նշելով. «Իշխանությունը հանձնաժողովի նախագահի շուրթերով ներկայացրեց իր որոշման հիմնավորումը՝ համակարգը չի կարելի խարխլել: Մինչդեռ, անցյալից ժառանգած պետական կառավարման այս համակարգի առաքելությունը մեզ նորգաղութային կախյալության մեջ պահելն է: Համակարգի միջուկը և վերարտադրության գրավականը 2018-ին ժողովրդական ընդվզմամբ մասամբ կազմաքանդված «խորքային պետությունն» է, որը բաղկացած է մոսկվահպատակ ԱԱԾ-ից, ոստիկանության և մյուս ուժային մարմինների վերնախավերից, ինչպես նաև քրեական օլիգարխիայից: Այսպես շարունակելու դեպքում ներկայումս խարխլված «խորքային պետությունը» իրական հնարավորություն կստանա ի վերջո վերարտադրվելու և չեզոքացնելու գործող իշխանությանն ու մեր ժողովրդի ձեռքբերումները՝ բոլորիս կանգնեցնելով ամեն ինչ զրոյից սկսելու անհրաժեշտության առաջ»,-նշված է կուսակցության տարածած հայտարարության մեջ։
«Սասնա ծռեր» համահայկական կուսակցության քարտուղարության համակարգող Վարուժան Ավետիսյանը «Առաջին լրատվական»-ի հետ զրույցում հայտնեց իրենց մտահոգությունները. «Մեր զգուշացումը հետևյալն է. «խորքային պետությունը» կվերարտադրվի և կվերարտադրի նաև կառավարման կիսագաղութային համակարգը՝ խժռելով և՛ գործող իշխանությանը և՛ ժողովրդի ձեռքբերումները, ու մենք ստիպված կլինենք ամեն ինչ զրոյից սկսել»։
Ինչո՞ւ իշխող ուժը մերժեց այս նախագիծը, Վարուժան Ավետիսյանը մեկնաբանեց հետևյալ կերպ. «Չունի կոնցեպցիա, չունի քաղաքական կամք, պետություն կառավարելու պատկերացում ու կայացած չէ որպես քաղաքական ամբողջություն, որպես թիմ, կոնգլոմերատ է։ Այս պատճառներով, ցավոք սրտի, ի զորու չէ կայացնելու անկախ պետություն։ Սա ամենացցուն դրսևորումն է։ Հատուկ ծառայությունների հանգամանքը շատ ցուցանիշային է այդպիսի դեպքերում, վերաբերմունքը, դրանք ձևավորելու, գործարկելու մոտեցումները, մեթոդները, խորքում եղած արժեքները. սրանք շատ կարևոր են պետություն ստեղծելու համար»։
Միևնույն ժամանակ Վարուժան Ավետիսյանը չի կարծում, թե խնդիրը լուծում կստանա, եթե այդ պաշտոններին նշանակվեն համակարգից դուրս եղած մարդիկ. «Ամբողջական լուծում չի ստանա, բայց խնդիրը լուծելու ճանապարհի վրա կանգնելու հնարավորություն կունենանք։ Այսինքն՝ դա մեկ քայլ մեզ կմոտեցնի խնդրի լուծմանը։ Հատկապես վերնախավն այսօր եթե ռուսական ագենտուրա չէ՝ առնվազն ռուսական կրեատուրա է և, բնականաբար, պիտանի չէ ազգային անվտանգության մարմինների համակարգ ձևավորելու համար։ Ընդհակառակը՝ նրանք, ըստ ամենայնի, խանգարել և խանգարելու են»։
Հարցին՝ կլինե՞ն այս հարցի շուրջ նոր առաջարկություններ իրենց կողմից, Ավետիսյանը պատասխանեց. «Երբ այս հարցը ծառացավ՝ մենք ծավալուն հայտարարությամբ ու բացատրություններով հանդես եկանք, ցույց տալով, թե ինչպես պետք է կազմաքանդել ազգային անվտանգության մարմինների եղած կիսագաղութային համակարգը, և ինչպես պետք է ձևավորել ազգային անվտանգության մարմինների ազգային համակարգ։ Մենք այդ առաջարկությունները ներկայացրել ենք և հավելյալ որևէ բան ասելու կարիք չկա, մանրամասն ամեն ինչ ներկայացված է»։
