Այսօր՝ դեկտեմբերի 3-ին, Ազգային ժողովում հայտարարությունների ժամին «Իմ քայլը» խմբակցության պատգամավոր Անդրանիկ Քոչարյանի հայտարարությունն առնչվում էր նախկին մի շարք պաշտոնատար անձանց փախուստին՝ Միքայել Հարությունյան, Վահագն Հարությունյան, Միհրան Պողոսյան և վերջերս նաև՝ Գևորգ Կոստանյան. «Դժվար է ասել, թե այս անվանացանկը դեռ ինչքան է համալրվելու, բայց մեկ բան հստակ է՝ այս նախկին պաշտոնյաները պետք է հասկանան, որ ժամանակին նրանց կառավարմանն են հանձնվել բազմաթիվ կարևոր կառույցներ»:
Նա ընդգծեց՝ խուսափելով ներկայանալուց և նախաքննական մարմնի հարցերին պատասխանելուց՝ այս անձինք ապացուցում են, որ ոչ միայն իրենք են փչացրել իրենց իսկ գլխավորած կառույցները, այլև պղտորում են բազմաթիվ պրոֆեսիոնալ կադրերի անցած ուղին. «Համապատասխան մարմինները պետք է քայլեր ձեռնարկեն օր առաջ նշյալներին տուն վերադարձնելու ուղղությամբ»:
Պատգամավորի խոսքով՝ Մարտի 1-ի բացահայտումը կփակի նաև պետության ողբերգական էջերից մեկը. «Ուստի առաջարկում եմ հնարավոր բոլոր տարբերակները կիրառել նրանց Հայաստան վերադարձնելու նպատակով: Խորությամբ գիտակցեք՝ աշխարհում ամենաանվտանգ վայրը ՀՀ-ն է: Այդ անձինք չեն կարող իրենց ապահով զգալ օտարության մեջ»:
Մանրամասները՝ տեսանյութում: