Երևանի ավագանու «Լույս» խմբակցության ղեկավար Դավիթ Խաժակյանը հայտնել էր, որ գործող իշխանություններն այլևս գործարար Սամվել Ալեքսանյանին չեն տեսնում որպես նախկին հանրապետական գործչի, և որ հենց Ալեքսանյանն է քաղաքին նվիրաբերել երկու տասնյակից ավելի ԿամԱԶ-ները։ Բիզնեսի տեսանկյունից ինչպիսի՞ն են ձեր դիտարկումները․ «Առաջին լրատվական»-ի հարցին Menu.am-ի հիմնադիր Վահան Քերոփյանը պատասխանեց․ «Նախ նշեմ, որ ես ու քաղաքապետ Հայկ Մարությանն ընկերներ ենք, դասընկերներ ենք, բայց դա չի խանգարում, որ ես լինեմ նրա ամենամեծ քննադատներից մեկը, որովհետև ես, որպես ընկեր, անպայման ուզում եմ, որ նա դառնա հաջողված քաղաքապետ։ Անդրադառնալով այս հարցին՝ ես ինչպես հասկանում եմ՝ նվիրաբերություններն արել են Հայաստանի Հանրապետությունում օրինական գործող ընկերություններ, որոնք օրենքին համապատասխան այսօր գործունեություն են ծավալում և արգելված չեն։ Այսինքն՝ ֆորմալ տեսանկյունից՝ նվերը ստացվել է մի ընկերությունից, որն այսօր օրինական գործունեություն է ծավալում Հայաստանում։
Իսկ ինչ վերաբերում է նվեր ստանալուն ու վերցնելուն, ապա իմ ընկալմամբ՝ քաղաքապետը, բնականաբար, համայնքի լավագույն շահերի համար գործող բիզնեսմենն է։ Հիմա կոնկրետ «Ալեքս Հոլդինգի» դեպքը։ Տարիներ առաջ նրանք սարքել են մի ինքնակամ շինություն, որն ուզում են օրինականացնել։ Ըստ երևույթին քաղաքապետարանը տեսել է՝ արդյոք օրենքով սահմանված կարգով իրենք հնարավորություն ունե՞ն դա օրինականացնել, թե՞ ոչ։ Տեսնելով, որ դրա իրավունքն ունեն, փորձել են անել այնպես, որ թե՛ քաղաքը շահի, թե՛ ընկերությունը շահի, և բոլորը գոհ լինեն, որովհետև, հակառակ դեպքում, չօրինականացնելով շինությունը՝ բոլորը դժգոհ կլինեն։
Այս առումով, բնականաբար, քաղաքի իշխանությունները պետք է ունակ լինեն բանակցել և ստանան քաղաքի համար լավագույն գործարքը՝ օրենքով սահմանված կարգով։ Ամեն օր էլ քաղաքում օրինականացվում են տարբեր ապօրինի շինություններ, և այդտեղ ոչ մի անօրինական բան չկա»։
Մանրամասները՝ տեսանյութում։