Օրերս տեղի ունեցավ մի ուշագրավ իրադարձություն, որը կարող էր շատ լուրջ հետևանքներ ունենալ Հայաստանի բանկային համակարգի, տնտեսության և ներդրումային գրավչության վրա ընդհանրապես: Խոսքը գործարար Գևորգ Աֆանդյանի՝ «ԱյԴի» բանկի դեմ դատական գործընթացի մասին է, որով գործարարը 22 մլն դոլար է պահանջում բանկից: Պարզաբանումների նպատակով «Առաջին լրատվական»-ը հյուրընկալել է «ԱյԴի» բանկի իրավաբանական վարչության պետ Արթուր Մելիքյանին:
Ներկայացնելով ամբողջ գործի նախապատմությունը՝ մեր զրուցակիցն ասաց. «Մենք կարծում ենք, որ այն հիմքերի առկայության դեպքում, որ մենք էինք ներկայացրել, Վերաքննիչ դատարանը պետք է ընդհանրապես մերժեր հայցը, ոչ թե ուղարկեր քննության, սակայն ունեցանք այն, ինչ ունեցանք»:
Նրա խոսքով՝ Երևան քաղաքի ընդհանուր իրավասության առաջին ատյանի դատարանը ընդհանրապես չի անդրադարձել Վերաքննիչ դատարանի կողմից բարձրացված հարցերին, չի լուծել Վերաքննիչի կողմից նկատված խնդիրները և կրկին վճիռ է կայացրել բանկից գումարի բռնագանձման վերաբերյալ. «Մեր կարծիքով՝ բացի նրանից, որ Վերաքննիչի ցուցումները չեն իրականացվել, այլև թույլ են տրվել այլ խախտումներ ևս: Դրա հետ կապված մենք կրկին ներկայումս Վերաքննիչ բողոք ենք ներկայացրել, և գործն այս պահին Վերաքննիչ դատարանում է՝ վարույթ ընդունելու փուլում»:
Արթուր Մելիքյանն ընդգծեց՝ չի կարելի գործարքը կնքել, մեկ տարի սպասել և ինչ-որ մի բան չստացվելուց հետո որոշել, որ բանկը քեզ պարտք է 22 մլն դոլար:
«Հայցվոր կողմը ընդհանրապես չի ապացուցել իր պահանջները՝ ո՛չ ապացուցել է այդ փաստաթղթի վավեր լինելը, ո՛չ ապացուցել է այդ գումարի չափը, ո՛չ ապացուցել է, որ բանկը խախտել է իր համաձայնությունը: Մեր տպավորությունն այն է, որ որևէ բան չապացուցվեց այս գործով, որևէ բան չտեղաշարժվեց նախկինի համեմատ, և մեզ համար զարմանալի է, թե ինչի հիման վրա կայացավ այս վճիռը: Մենք բարձրաձայնել ենք այս հարցը, քանի որ կարծում ենք՝ համակարգային խնդիր է առաջանում այս գործի հետ կապված: Բանկը 100 տոկոսով օտարերկրյա կապիտալով բանկ է, և դա չի կարող անհետևանք մնալ ՀՀ ներդրումային միջավայրի վրա՝ բացասական առումով»,- հավելեց մեր զրուցակիցը:
Հարցազրույցն ամբողջությամբ՝ տեսանյութում: