Լուրեր
Առողջապահական ապահովագրության հաշվարկը արվել է այսօրվա «սև» հարկային դաշտով, որ թերի է. որ ոլորտներն են տուժում
  • 09:40
  • 2019-12-02
  • Դիտումներ՝ *

Առողջապահության նախարարությունը հանրային քննարկման է դրել Հայաստանում առողջության համապարփակ ապահովագրության ներդրման հայեցակարգի նախագիծը: Նախագծի շուրջ արդեն իսկ ծավալվում են թեժ քննարկումներ:
Թեմայի շուրջ «Առաջին լրատվական»-ի հետ քննարկմանը մասնակցեցին Առողջապահության նախարարության պետական առողջապահական գործակալության պետ Ծաղիկ Վարդանյանը և ծրագրավորող Լևոն Հարությունյանը:

Ծաղիկ Վարդանյանի խոսքով՝ շարունակաբար անհրաժեշտություն կար նման նախագծով հանդես գալու. «Տարիներ շարունակ այս խնդիրը սրացել է ժամանակ առ ժամանակ, անգամ հայեցակարգ ենք ունեցել, սակայն վերջնական արդյունքի չենք հասել, երևի թե քաղաքական կայուն կամքի բացակայության, սոցիալ- տնտեսական ոչ նպաստավոր պայմանների պատճառով, կամ ավելի առաջնահերթ խնդիրներ են եղել»:

«Պետական առողջապահական գործակալությունը ստեղծվել է որպես նախատիպ պետական ապահովագրական գործակալության: Աշխատանքային խումբը ավելի քան մեկ տարի աշխատել է, նոր մոդելի ներդրման անհրաժեշտություն էր առաջացել, որը կբերի առավել արդյունավետ բուժսպասարկման ծառայությունների մատուցման և ծախսարդյունավետ ցուցանիշների»,- նշեց Ծ. Վարդանյանը՝ հավելելով՝ ընդունելի է, որ նախագծի շուրջ թեժ քննարկում է ծավալվում:

Անդրադառնալով դիտարկմանը, որ ըստ առողջապահության նախարար Արսեն Թորոսյանի՝ այս նախագծի դեմ ամենաթեժ արձագանքը ՏՏ ոլորտի ներկայացուցիչների և հաշվապահների կողմից է, նշեց. «Նախ՝ IT ոլորտն ու հաշվապահներն իրականում ավելի շատ հավելյալ արդյունք են ստեղծում, քան ամբողջ պետական համակարգը: Խնդիրն այն է, որ այս նախագծով տուժում են միջին եկամուտ ստացող աշխատողները, ովքեր աշխատում են հարկային՝ «սպիտակ» դաշտում և բավական մեծ հարկ են վճարելու, և «սպիտակ» դաշտում աշխատողը դրա դիմաց չի ստանալու ոչինչ: Օրինակ՝ մեր կազմակերպությունն ունի ապահովագրություն, և մեր փաթեթն ավելի մեծ է, քան առաջարկվում է պետական համապարփակ ապահովագրությունը»:

«Առողջապահական ապահովագրության հաշվարկը արվել է այսօրվա «սև» հարկային դաշտով, որը թերի է»,- ընդգծեց Լևոն Հարությունյանը՝ հավելելով, որ պետությունն իր ֆինանսական խնդիրները (նախարարության ներկայացուցիչներից մեկը մի հաղորդման ժամանակ ասաց, որ ունեն 200 միլիարդի դեֆիցիտ), ուզում է լուծել այս հարկատեսակով:

Մանրամասն՝ տեսնայութում:

  • Դիտումներ՝ *