«Տնտեսական ակտիվության 7 տոկոս աճը լավ ցուցանիշ է, եթե համեմատում ենք կանխատեսվող ցուցանիշների հետ: Արտահանման հարցում մեծ նշանակություն ունի սեզոնայնությունը: Իսկ ընդհանրապես մեր արտահանման և ներմուծման վիճակագրությունը իրականությունից բավական շեղված է, որովհետև մի կողմից՝ կան մեքենաների ներդրման մեծ ծավալներ, մյուս կողմից՝ Հայաստանի տարածքով Եվրասիական միություն գնացող հայկական համարանիշներով մեքենաները, բնականաբար, չեն գրանցվում որպես արտահանում: Այսինքն՝ արտաքին առևտրի մասին միայն պաշտոնական վիճակագրական տվյալների հիման վրա խոսելը կարող է իրականությունից տարբերվող լինել»,- «Առաջին լրատվական»-ի հետ զրույցում ասաց ԱԺ տնտեսական հարցերի հանձնաժողովի նախագահ Բաբկեն Թունյանը:
Նրա խոսքով՝ այդ մեքենաների ներմուծումը փաստորեն վիճակագրորեն ձևակերպվում է, իսկ արտահանումը՝ ոչ, ինչն էլ վատթարացնում է ՀՆԱ-ի ցուցանիշը. «Այսինքն՝ փաստացի այսօր ՀՆԱ-ն ավելի մեծ է, քան ցույց է տալիս վիճակագրությունը»:
Դիտարկմանը՝ այս տարի մոտ 140 հազար մեքենաներ են ներմուծվել, ինչը հաջորդ տարի չի կարող տեղի ունենալ՝ կապված Մաքսային միության իրավակարգավորումներին անցնելու հետ, արդյոք սա չի՞ ազդի ՀՆԱ-ի վրա, Բաբկեն Թունյանը բացասական պատասխան տվեց. «Չեմ կարծում, որ ՀՆԱ-ի վրա շատ մեծ ազդեցություն կունենա, քանի որ վերոնշյալ 140 հազար թիվը վկայում է այն մասին, որ շուկան և տնտեսվարողները նախապատրաստվել են այս անցումային փուլին»:
Մեր զրուցակցի խոսքով՝ այսօր արդեն Հայաստանում կուտակվել է այնքան մեքենաների պաշար, որ առնվազն 1-1.5 տարի բավարար է այդ առևտրի համար. «Այնուամենայնիվ, Հայաստանի զարգացման միջնաժամկետ և երկարաժամկետ հեռանկարը այս ուղղության վրա չի հիմնված. մենք մտածում ենք, որ շեշտը պետք է դրվի ավելի լուրջ ուղղությունների վրա»:
Հարցազրույցն ամբողջությամբ՝ տեսանյութում: