Եգիպտոսի արտգործնախարար Էբուլ Գեյթը պաշտոնական այցով գտնվում է Անկարայում: Երկու երկրների արտաքին գերատեսչությունների ղեկավարները հանդիպել ու բանակցել են մերձավորարևելյան տարածաշրջանի կարևորագույն խնդիրների շուրջ: CnnTurk-ի տեղեկացմամբ, Թուրքիայի և Եգիպտոսի միջև 2007թ. «ռազմավարական երկխոսություն» կար: Այժմ այդ հարաբերություններին նոր որակ է հաղորդվելու: Երկու երկրների միջև հիմնվում է ռազմավարական համագործակցության բարձրագույն խորհուրդ: Իրաքի, Սիրիայի, Հորդանանի, Լիբանանի և Ռուսաստանի հետ Թուրքիան արդեն հիմնել է նման խորհուրդներ: «Աշխատանքներն ավարտել ենք: Պայմանագիրը պատրաստ է իրագործման»,- հայտարարել է Թուրքիայի ԱԳ նախարար Ահմեդ Դավութօղլուն: Տեղեկացվում է նաև, որ Դավութօղլուն մի քանի օրից մեկնելու է Վաշինգտոն` ստանալու միջազգային մեծ հեղինակություն ունեցող ամսագրերից մեկի` «Foreign Policy»-ի սահմանած մրցանակը: Սպասվում է Դավութօղլուի հանդիպումը ԱՄՆ-ի կառավարության և կոնգրեսի բարձրաստիճան ներկայացուցիչների հետ: