Լուրեր
Վանեցյանը տիրապետում է մեծածավալ ինֆորմացիայի․ նա կփորձի դրանք հրապարակայնացնել
  • 12:40
  • 2019-12-02
  • Դիտումներ՝ *

«Սասնա ծռերը» տարածել է հայտարարություն, որում մասնավորապես նշում է, թե ինչ գործողություններ կիրականացվեին իրավապահների կողմից, «եթե Հայաստանն ունենար իրավապահ մարմիններ, այլ ոչ թե ընդամենը դրանց անվան տակ հանդես եկող անգործունակ կառույցներ»: Հայտարարությունն ավարտվում է մամուլի ասուլիսում Վիտալի Բալասանյանի արտաբերած մտքերի մեջբերումով:

Այս առնչությամբ քաղտեխնոլոգ Կարեն Քոչարյանը «Առաջին լրատվական»-ի հետ զրույցում ասաց. «Ոստիկանությունը միշտ, այսօր՝ առավել ևս, եղել է բավականին պրոբլեմատիկ կառույց՝ դեռևս Խորհրդային Միությունից սկսած, ուստի ես չեմ կարող չհամաձայնել: Բայց, օրինակ, «Սասնա ծռերի գործողություններն էլ ենք, չէ՞, տեսել. ի՞նչ են նրանք ասում՝ «ԿամԱԶ»-ով պետք է մտնեին ՊՊԾ, դա՞ է լինելու գործողությունը. եթե դա է լինելու, դա էլ է ինձ համար անընդունելի»

Նրա խոսքով՝ այս երկրի պրոբլեմը ռադիկալիզմն է՝ երբ մի ծայրահեղությունից միանգամից ընկնում են մեկ այլ ծայրահեղության մեջ. «Դա վերաբերում է նաև իրավապահ համակարգին, երբ, օրինակ, ոստիկանները կարող էին խոշտանգելով մարդ սպանել, իսկ հիմա ոստիկաններին տրանսգենդերները ոստիկանությունում ծեծում են: Մենք չենք կարողանում գտնել ոսկե միջինը և գնալ այն ճանապարհով, ինչով գնում է ամբողջ քաղաքակիրթ աշխարհը»:

Կարեն Քոչարյանը նշեց, որ համեմատության մեջ  ԱԱԾ-ն եղել է և կմնա ամենապրոֆեսիոնալը. «Դա այն իրավապահ մարմինն է եղել, որը համակարգային առումով զերծ է եղել կոռուպցիայից»:

«GALLUP International association»-ի հայաստանյան ներկայացուցչության տնօրեն Արամ Նավասարդյանն էլ նկատեց, որ ոստիկանության և ԱԱԾ-ի աշխատանքը չպետք է գնահատել «Սասնա ծռերի» հայտարարության պրիզմայով. ««Սասնա ծռերը» այն ուժը չէ, որ պետք է գնահատական տա նրանց աշխատանքին»:

Նրա խոսքով՝ ԱԱԾ-ի վերջին 2-3 ղեկավարները պրոֆեսիոնալ չեն եղել. «Եթե Սերժ Սարգսյանի օրոք ԱԱԾ ղեկավարը պրոֆեսիոնալ լիներ, տեղի չէր ունենա այն, ինչ եղավ 2018 թվականին, երբ հանկարծակիի բերեցին իշխանությանը: Ես վստահ եմ, որ Գորիկ Հակոբյանից հետո այդ կառույցում մենք չենք ունեցել պրոֆեսիոնալ ղեկավար: Իսկ եթե ԱԱԾ-ն լավատեղյակ է եղել այդ բոլոր պրոցեսներից, այստեղ ուրիշ հարցեր են ծագում»:

Ինչ վերաբերում է իրավապահ համակարգի գնահատականին, Արամ Նավասարդյանը նշեց, որ նախկինում և՛ պարոն Վանեցյանը, և՛ ոստիկանապետը բավական բարձր վարկանիշ ունեին. «Ամենաբարձր ռեյտինգ ունեցողների առաջին եռյակում էին Նիկոլ Փաշինյանը, Արթուր Վանեցյանը և Վալերի Օսիպյանը»:

Մեր զրուցակիցը հավելեց նաև, որ ոստիկանության աշխատանքում թերացումներն ակնառու են. «Միանշանակ է, որ կրիմինալն իրեն այսօր առավել ազատ է զգում. շաբաթական երկու անգամ մենք տեսնում ենք հրազենի կիրառման հաղորդագրություն»:

 

Հարցազրույցն ամբողջությամբ՝ տեսանյութում:

  • Դիտումներ՝ *