Եվրահանձնաժողովի ղեկավարի պոստը լքող Ժան-Կլոդ Յունկերը, լրագրողների հետ վերջին պաշտոնական շփման ժամանակ, խոսել է իր իրավահաջորդ Ուրսուլա ֆոն դեր Լյաենի ԵՀ շենքում իր գրասենյակի կողքին բնակվելու մտադրության մասին: Այդ մասին հայտնում է «ՌԻԱ Նովոստին»:
Ավելի վաղ եվրոպական լրատվամիջոցներում տեղեկատվություն էր հայտնվել այն մասին, որ Եվրահանձնաժողովի նոր ղեկավար դեր Լյաենը չի պատրաստվում առանձին բնակարան վարձել Բրյուսելում: Փոխարենը նա նախատեսում է գիշերել Բրյուսելի իր գրասենյակի մոտակայքում գտնվող ԵՀ շենքի 13-րդ հարկում:
«Ես ինձ թույլ չեմ տա տիկին ֆոն դեր Լյաենին խորհուրդներ տալ այն մասին, թե ինչպես նա պետք է անցկացնի իր գիշերներն այստեղ՝ Եվրահանձնաժողովի շենքում», – ասել է Յունկերը՝ հավելելով, որ հարգում է իրավահաջորդի կողմից ընդունված որոշումը և չի միջամտի այս հարցում:
Քաղաքական գործիչը հրաժարական կտա 2019-ի դեկտեմբերի 1-ին: Նոյեմբերի 29-ին, ԵՀ ավանդական ամենօրյա ճեպազրույցում, նա հրաժեշտ է տվել լրագրողներին: