Լուրեր
Կառավարությունը պետք է լրացնի այն բացը, որտեղ մասնավորի կողմից ներդրումներ չեն կատարվում
  • 10:30
  • 2019-11-30
  • Դիտումներ՝ *

Ըստ կառավարության պաշտոնական տվյալների՝ Հայաստանի միջազգային պահուստները գտնվում են պատմական ամենաբարձր մակարդակի վրա, և նախորդ տարվա համեմատ ավելացել են 19 %-ով: Մասնավորապես՝ 2019թ-ի  հոկտեմբեր ամսվա դրությամբ համախառն միջազգային պահուստները կազմել են 2 միլիարդ 468․5 միլիոն ԱՄՆ դոլար, իսկ նախորդ տարի՝ 2018թ-ի հոկտեմբերի դրությամբ՝ համախառն միջազգային պահուստները կազմել են 2 միլիարդ 83 միլիոն ԱՄՆ դոլար, այսինքն այս տարի նախորդ տարվա նույն ժամանակահատվածի համեմատ դրանք ավել են 19 %-ով։

Տնտեսագետ Աշոտ Մարկոսյանի գնահատմամբ՝ միջազգային պահուստների ավելացումը տվյալ երկրի ֆինանսական կայունության լավագույն ապացույցն է և այս իմաստով, ըստ նրա՝ վերոնշյալ ցուցանիշը բավականին  գոհացուցիչ է, ինչը   հիմնականում պայմանավորված է  այն իրավիճակով, որն այսօր կա Հայաստանում։

«Տաբեր երկրների ֆինանսական վիճակի մասին պատկերացում կազմելու համար հիմնականում դիտարկում են հենց միջազգային պահուստների ցուցանիշները։ Սա հնարավորություն է տալիս ոչ միայն կայունացնել  դրամավարկային քաղաքականությունը, այլ նաև սպառողական շուկան։ Ըստ էության, ստացվում է, որ սա նաև անուղղակի ձևով գների զսպման միջոց է, քանի որ ցանկացած պահի պետությունն ունենում է  ֆինանսական հնարավորություններ և կարողանում է դրանք օգտագործել, բայց  խնդիրն այն է, որ դրանց օգտագործման մակարդակը պետք է որոշ չափով ապահովվի, այսինքն՝ այդ միջոցներն առավելապես պետք է ներդնել   տնտեսության այն ոլորտներում, որոնք  արդյունավետ են և կարող են բնակչության համար բարենպաստ պայմաններ ստեղծել»,- «Առաջին լրատվական»-ի հետ զրույցում ասաց Աշոտ Մարկոսյանը։

Վերջինիս համոզմամբ՝ այս գումարների ծախսման հիմնական ուղղությունը պետք է լինի հանրային ծառայությունների մատուցումը, հատկապես՝ ենթակառուցվածքների զարգացումն ու  ճանապարհաշինարարությունը։

«Այդ հավելյալ ռեսուրսները պետք է  նշածս ուղղություններով օգտագործվեն, որովհետև դրանք  այն ոլորտներն են, որտեղ մասնավորի կողմից ներդրումներ չեն կատարվում և այդ բացը պետք է պետությունը լրացնի»,- ընդգծեց  տնտեսագետը։

 

Մանրամասները՝ տեսանյութում։

  • Դիտումներ՝ *