«Հայաստան» համահայկական հիմնադրամի տարեկան դրամահավաքն այս տարի անցկացվում է «Ես իմ անուշ Հայաստանի. կենարար ջուր և արև համայնքներին» խորագրի ներքո: Հայտնի է, որ արդեն հավաքվել է գրեթե 10 միլիոն դոլար:
Թեմայի շուրջ «Առաջին լրատվական»-ի հետ զրույցում «Հայաստան» համահայկական հիմնադրամի ծրագրերի բաժնի ղեկավար Աննա Աղաջանյանը նշեց, որ այս 10 մլն դոլարը միայն առաջին փուլում է հավաքվել. «Այս գումարը հավաքվել է ոչ միայն երեկ գիշերը Հայաստանից և Միացյալ Նահանգներից, այլ նաև վերջին մեկ ամսվա ընթացքում մեր բոլոր տեղական մարմիններից. տեղական մարմիններ ունենք Տորոնտոյում, Մոնրեալում, եվրոպական երկրներում, և մեկ ամսվա ընթացքում այնտեղ տարբեր գումարահավաքներ են իրականացվել, ճաշկերույթներ, ֆոնետոններ են կազմակերպվել և մեծ գումարներ են հավաքագրվել այս տարվա հեռուստամարաթոնի համար»: Մեր զրուցակիցը հավաստիացրեց, որ հետագայում նոր գումարներ կհավաքվեն:
Աննա Աղաջանյանի խոսքով՝ գումարի մեծ մասը օգտագործվելու է Արցախում և Հայաստանի երեք մարզերում՝ Տավուշում, Լոռիում և Շիրակում արևային էներգիայի կիրառման ծրագրերի իրականացման համար: Գումարի մի մասն էլ հատկացվելու է առողջապահական, կրթական և այլ ծրագրերի իրականացման համար:
Մանրամասն՝ տեսանյութում: