Նախորդ հինգ տարիներին հայաստանյան բարձր տեխնոլոգիաների ոլորտի՝ high tech-ի ծավալներն ավելի քան կրկնապատկվել են, և ծրագրվում է առաջիկա հինգ տարիներին ոլորտում գրանցել առնվազն 60 տոկոս աճ՝ բարձր տեխնոլոգիաների ոլորտի շրջանառությունը հասցնելով 400 միլիոն դոլարի: Այս մասին հայտարարել է բարձր տեխնոլոգիական արդյունաբերության նախարար Հակոբ Արշակյանը:
«Առաջին լրատվական»-ի հետ թեմայի շուրջ զրույցում անդրադառնալով այս դիտարկմանը՝ X-TECH ընկերության տնօրեն, ARLOOPA ընկերության համահիմնադիր Արման Աթոյանը նշեց, որ այս թվերն իրատեսական են. «Նույնիսկ ավելի հավակնոտ պլաններ կարելի է դնել: Հայաստանում իրապես ՏՏ ոլորտը պետք է դառնա գերակա ճյուղ և դառնա լոկոմոտիվ ու շարժիչ մյուս ոլորտների համար: Փոքր երկիր լինելը կամ ծով չունենալն ամենևին էլ չի խանգարում ոլորտի զարգացմանը, որովհետև կարող է IT արտադրանքը արտահանվել՝ անմիջապես տեղադրվելով այնտեղ, որտեղից ներբեռնում են հավելվածները»:
2018թ. բարձր տեխնոլոգիաների ոլորտում կին աշխատողների քանակը 38 տոկոսի է հասել, սա լուրջ պրոգրես է։ Արման Թաթոյանի դիտարկմամբ՝ կանանց և աղջիկների հետաքրքրությունը մեծացել է ՏՏ ոլորտի նկամամբ, ինչը շատ ուրախալի է:
Մեր զրուցակցի կարծիքով՝ պետք է հեղափոխություն անել նաև ՏՏ առումով, այսինքն՝ տնտեսության բոլոր ճյուղերը «IT-ֆիկացնել», մարդկանց կրթել, դրա համար անհրաժեշտ է հնարավորինս շատ գովազդել ՏՏ ոլորտը:
«ՏՏ ոլորտը կարող է ստեղծել այնպիսի արժեք, որը հավասարազոր է մի մեծ հանքի շահագործման»,- հավաստիացրեց մեր զրուցակիցը: Նա նաև հավելեց, որ անհրաժեշտ է աշխատել ոչ թե մեծ ռեսուրսներ ունենալու, այլ ՏՏ արտադրանքի նորարարության և բարձրորակության ուղղությամբ:
Մանրամասն՝ տեսանյութում:
