Լուրեր
Վանեցյանը Արամ Ա կաթողիկոսի խոսքերը մեջբերելով՝ իր քաղաքական քայլերին փորձում է կշիռ հաղորդել
  • 12:45
  • 2019-11-29
  • Դիտումներ՝ *

ԱԱԾ նախկին տնօրեն Արթուր Վանեցյանը ինստագրամյան իր էջում մեջբերել է Մեծի Տանն Կիլիկիո կաթողիկոս Արամ Առաջինի գրառումից մի հատված՝ փաստացի միանալով Արամ Առաջինի՝ հայաստանյան իշխանությունների հասցեին հնչեցրած կոշտ քննադատությանը. «Եթե հեղափոխությունը հակազդեցությունից ու հաստատումից բացի՝ ժողովրդի կյանքը հեղափոխող գործոն չի դառնալու, ապա այն սոսկ դատարկ մի պղպջակ է»: Թեման քննարկելու համար «Առաջին լրատվական»-ը հյուրընկալել է քաղաքագետ Սարո Սարոյանին և ԱԺ «Իմ քայլը» խմբակցության պատգամավոր Միքայել Զոլյանին:

Միքայել Զոլյանը նշեց, որ սա հրապարակել է ԱԱԾ նախկին տնօրենը, ոչ թե կաթողիկոսը. «Ինձ թվում է՝ կաթողիկոսը սրա հետ ընդհանրապես որևէ կապ չունի: Այդ պնդումը կոնտեքստից հանված է, և կարող էին նույն բանը տարբեր մարդիկ շատ տարբեր համատեքստերով ասել»:

Մեր զրուցակցի կարծիքով՝ այս սադրանքի նպատակն այն է, որ իրենք սկսեն քննադատել Մեծի Տանն Կիլիկիո կաթողիկոսին, որը, բնականաբար, մեծ հեղինակություն է վայելում և՛ Սփյուռքում, և՛ Հայաստանում. «Սա որոշակի մարտավարություն է, որ ընտրված է մի խումբ անձանց կողմից, ովքեր գտնվում են Հայաստանում և կապված են նախկին իշխանության հետ կամ ավելի պարզ ասած՝ այդ նախկին իշխանության անվան տակ հանդես եկող մաֆիոզ կառույցի մի մասն են կամ այդ կառույցի շահերն են սպասարկում»:

Ինչպես նշեց պատգամավորը՝ նրանք փորձում են բոլոր ճակատներով վնաս հասցնել Հայաստանի պետականությանը. «Փորձում են հայ-ռուսական հարաբերությունները խաթարել, Հայաստանի և Եվրամիության միջև հարաբերությունները խաթարել: Նույն մարդիկ գնում են Ռուսաստան և ասում են՝ սրանք Սորոսի փողերով հեղափոխություն են կատարել և հիմա ուզում են գնալ ՆԱՏՕ, հետո գնում են Եվրամիություն և ասում են՝ սրանք ռուսների կամակատարներն են»:

Միքայել Զելյանն ընդգծեց, որ կա նաև մեկ այլ ուղղություն՝ Սփյուռքի հետ Հայաստանի հարաբերությունները փչացնելու ուղղությամբ է աշխատանք կատարվում. «Սա համակարգվող աշխատանք է. մարդիկ, ովքեր սա անում են, հստակ գիտակցում են՝ ինչի համար են անում: Մեղմ ասած՝ սա անբարոյական գործելակերպ է՝ հանուն իրենց անձնական շահերի: Ես կոչ եմ անում չտրվել այդ սադրանքներին և հիշել, որ Սփյուռքի մեր հայրենակիցները, այդ թվում նաև Մեծի Տանն Կիլիկիո կաթողիկոսը, կարող են սխալ տեղեկատվություն ստանալ Հայաստանից. նրանց պետք է ճիշտ տեղեկատվություն հաղորդել»:

Քաղաքագետ Սարո Սարոյանն էլ նշեց, որ այդ գրառումը հրապարակել է Վանեցյանը. «Եվ Անթիլիասի հետ այդ կապը չի երևում: Գործող սուբյեկտը Վանեցյանն է, դա կապված է իր քաղաքական կարիերայի հետ: Ես չեմ բացառում, որ կարող են լինել Դաշնակցության հետ կապված խնդիրներ, բայց դա պետք է կոնկրետ լինի»:

Նրա խոսքով՝ սա Վանեցյանի հերթական քաղաքական քայլն է, և այդ մեջբերմամբ էլ փորձել է իր խոսքին կշիռ տալ. «Թե չէ այդ տեքստի տակ բոլորս էլ կարող ենք ստորագրել. հիմա պետք է քննարկել, թե արդյոք հեղափոխությունը շեղվե՞լ է իր ուղուց, և եթե շեղվել է, ապա՝ ո՞ր հարցերում»:

 

Հարցազրույցն ամբողջությամբ՝ տեսանյութում:

  • Դիտումներ՝ *