Ռոբերտ Քոչարյանի կալանքի տակ գտնվելը չի խանգարում Փաշինյան-Պուտին հարաբերությանը, որում ձևավորվել է բավականին լավ աշխատանքային փոխհարաբերություն, և այն հիանալի զարգանում է: Այս հայտարարության հեղինակը ՌԴ նախագահի մամուլի քարտուղար Դմիտրի Պեսկովը, որն այդ մասին Բիշքեկում ասել է «Սպուտնիկ Արմենիա» ռուսական պետական լրատվական գործակալությանը: Պեսկովը ասել է, որ Պուտինը Երևանում հանդիպել է Քոչարյանի տիկնոջ հետ, պահպանում է ընկերական կապը երկրորդ նախագահի հետ՝ միաժամանակ նշելով, որ Հայաստանում տեղի ունեցած իշխանափոխությունից հետո բավականին ժամանակ է անցել, և հայ-ռուսական դադարը լրացվել է:
Թեմայի շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, քաղաքագետ Արկադի Վարդանյանը և իրավապաշտպան Կարո Եղնուկյանը:
Անդրադառնալով Պեսկովի վերոնշյալ հայտարարությանը՝ Ազատ Արշակյանը կարծիք հայտնեց, որ եթե Ռուսաստանի համար Ռոբերտ Քոչարյանի կարգավիճակը կարևոր լիներ, ապա այնպիսի բան կառաջարկեին Նիկոլ Փաշինյանին, որից հրաժարվել նա չէր կարող. «Օրինակ՝ կարող էին շանտաժի ենթարկել՝ առաջարկել սպառազինությունների անահավասարակշռություն՝ հօգուտ Ադրբեջանի, և այլն»:
«Մոսկվան լքել է Ռ. Քոչարյանին և Ս. Սարգսյանին, նրանք իրենց համար անվստահելի են»,- ընդգծեց Ա. Արշակյանը:
Արկադի Վարդանյանի դիտարկմամբ՝ «Պանդորայի արկղն» արդեն բացվել է և այլևս փակել հնարավոր չէ. «Քոչարյանի հետ կապված այդ խճճված գործը, որի բուն դատավարությունն այդպես էլ չի սկսվում, մի ամբողջ շղթայի մեկ օղակն է, եթե փորձեն ձեռք տալ, ամբողջ շղթան միանգամից կբացվի, և Ռուսաստանն իր հզոր կարողություններով կհայտնվի խայտառակ վիճակում: Ռուսաստանի հաշվարկները՝ հայանպաստ հայտարարությունները համարում եմ շատ ճիշտ: Ռուսաստանը այս հայտարարություններով ցույց է տալիս հանդուրժողականություն Հայաստանում տեղի ունեցած փոփոխությունների նկատմամբ»:
Կարո Եղնուկյանի դիտարկմամբ՝ դիվանագիտական խոսքը կարող է տողատակեր ունենալ և մեսիջներ ուղղել, բայց իրականում դրանով թաքցնել ճիշտ հակառակը՝ իրենց հոգում եղածը: «Ես կարծում եմ, որ պուտինյան Ռուսաստանը չի հանդուրժում Նիկոլ Փաշինյանին,- նշեց Կ. Եղնուկյանը:- Պեսկովն ասում է մի բան, բայց իրենք այլ բան են անում, օրինակ՝ Արցախում քաջալերում են հակահեղափոխականներին»:
Մանրամասն՝ տեսանյութում:
