Ճանապարհային ոստիկանության պետի տեղակալ Արթուր Տոնոյանի ու ՃՈ պետհամարանիշների գործի լիարժեք քննության ընթացքում առաջիկայում կարող են լինել նոր աղմկոտ ձերբակալություններ։
Հիշեցնենք, որ ՀՀ ոստիկանությունում Պետական վերահսկողական ծառայության կողմից իրականացված ստուգումների արդյունքում պարզվել էր, որ ոստիկանությունը «Բիլլ Սթոուն» ընկերության հետ մեկ անձից գնման միջոցով 848 մլն դրամի պայմանագիր է կնքել տրանսպորտային միջոցների հաշվառման համարանիշների տպագրման աշխատանքների, վարորդական վկայականների և տրանսպորտային միջոցների հաշվառման վկայագրերի տպագրման և այլ աշխատանքներ իրականացնելու համար: Ուշագրավ է, որ այդ ծառայությունները ոստիկանությանը մշտապես մատուցել է այդ ընկերությունը, որը առաջարկել է շուկայականից ավելի բարձր գին։ Միայն հեղափոխությունից հետո այդ ոլորտում նոր խաղացողներ են հայտնվել, որոնք մատուցել են նույն ծառայությունը։
Մամուլն արդեն գրել է, որ ՀՔԾ-ում քննվող գործի շրջանակներում հարցաքննվել է նաև ՀՀ ոստիկանության պետի տեղակալ Վարդան Մովսիսյանը, նրան առաջիկայում մեղադրանք կառաջադրվի։ Գործով անցնում է նաև ՀՀ ոստիկանության պետի նախկին տեղակալ Անուբաղ Համբարյանը:
«Առաջին լրատվական»-ի տեղեկություններով՝ այս գործի հետ առնչություն ունի նաև ոստիկանության 6-րդ վարչության պետի նախկին տեղակալ, կոռուպցիայի և տնտեսական հանցագործությունների դեմ պայքարի վարչության նախկին պետ, ամենակոռումպացված ոստիկանի համբավ ունեցող Միհրան Դավթյանը։ Ամիսներ առաջ «Առաջին լրատվական»-ը գրել էր, որ Դավթյանի դեմ քրեական գործ է հարուցվել միանգամից երկու հոդվածով՝ պաշտոնեական դիրքի չարաշահում և ապօրինի հարստացում։ Մենք գրել էինք, որ պաշտոնեական դիրքի չարաշահումը վերաբերում է Ճանապարհային ոստիկանությանը առնչվող գործին։ Խոսքը վերաբերում է հենց այս՝ ՃՈ համարանիշների գործին։ Միհրան Դավթյանը, ով ի պաշտոնե պետք է պայքարեր կոռուպցիայի, հովանավորչության դեմ, ճիշտ հակառակն է արել։ Նա տեղյակ է եղել, որ տարիներ շարունակ հենց այդ կազմակերպությունն է այդ ծառայությունները մատուցում, ընդ որում՝ ավելի բարձր գներով, և որևէ քայլ չի ձեռնարկել։ Մեր տեղեկություններով՝ պարբերաբար տարբեր ընկերություններ դիմել են Դավթյանին, տեղյակ պահել, որ ապօրինի է նման չափի գնումը կատարել մեկ անձից, սակայն Միհրան Դավթյանը անգործություն է ցուցաբերել։
Հատուկ Քննչական ծառայությունում ներկայումս Միհրան Դավթյանի մասով գործը դեռևս քննվում է, սակայն Դավթյանը որևէ կարգավիճակ չունի այդ գործով։ Ավելին, նրան կհաջողվի նաև այս գործով «ջրից չոր» դուրս գալ, քանի որ նա ազդեցիկ հովանավորներ ունի, այդ թվում՝ ՀՔԾ-ում։ Մենք բազմիցս գրել ենք, որ Դավթյանին հովանավորում է մոսկվաբնակ մեծահարուստ Արմեն Գինոսյանը՝ բոլորին հայտնի Մանախի Արմենը, ով մտերիմ է նաև ՀՔԾ պետի տեղակալ Հովհաննես Ենոքյանի հետ, որի թեթև ձեռքով էլ թերևս ՀՔԾ-ում ծածկադմփոց է արվում Միհրան Դավթյանի մասով ցանկացած քրեական գործը։
Հենց այդ հովանավորչության արդյունքում էլ Միհրան Դավթյանը ներկայումս Հայաստանում չէ։ Նա ԱՄՆ-ում է և զբաղվում է իր բիզնեսի գործերով։
Մեր տեղեկություններով՝ ԱՄՆ-ում Միհրան Դավթյանը ունի խանութ-ռեստորանային բիզնես, ինչպես նաև ավտոպահեստամասերի բիզնես։