Լուրեր
«ԱԶԲ-ի հետ համագործակցությունը  մեզ հիմա օդ ու ջրի նման հարկավոր է. նախահեղափոխական պայմաններն այլևս չկան»
  • 10:00
  • 2019-11-29
  • Դիտումներ՝ *

«Հայաստանին օդ ու ջրի նման անհրաժեշտ է «Հյուսիս-Հարավ» ճանապարհի կառուցումը՝  միանգամայն այլ որակով, որի արդյունքում մենք կդառնանք լրջագույն տարանցիկ երկիր, բացի սրանից Սյունիքի հատվածում  մենք երկու խոշոր թունել պիտի կառուցենք, իսկ Հայաստանի տնտեսաաշխարհագրական դիրքն այնպիսին է, որ ճանապարհաշինարարության յուրաքանչյուր միավոր մեզ վրա շատ թանկ է նստում, էլ չեմ ասում երկաթուղու կառուցման մասին, որը  նույնպես մեծ գումարների հետ է կապված։ Հետևաբար, այս իմաստով՝ Ասիական զարգացման բանկի հետ այս նոր համագործակցությունը մեզ շատ  է հարկավոր․ եթե ունենայինք  լրացուցիչ գումարներ, ապա գուցե նրանց հետ չհամագործակցեինք, բայց ներկա դրությամբ, եթե միանգամից խոշորածավալ  ֆինանսական միջոցները տրվելու են և տրվելու են հարմար տոկոսադրույքներով, ուրեմն, անպայման, պետք է օգտագործենք»,-«Առաջին լրատվական»-ի հետ զրույցում նշեց Ազգային Ժողովի «Բարգավաճ Հայաստան» խմբակցության պատգամավոր Միքայել Մելքումյանը՝ անդրադառնալով Ասիական զարգացման բանկի (ԱԶԲ) հետ Հայաստանի համագործակցության  նոր 5-ամյա ռազմավարության ծրագրին։

Հիշեցնենք, որ Ասիական զարգացման բանկը  հաստատել է Հայաստանի համար գործընկերության նոր 5-ամյա ռազմավարությունը, որը միտված է տնտեսական դիվերսիֆիկացիայի մեծացմանը և  տնտեսական աճից օգտվելու ապահովմանը։

Հայաստանի համար 2019–2023 թվականների երկրի գործընկերության նոր ռազմավարության շրջանակում ԱԶԲ-ն  կարևորելու է  ներդրումներն առաջնահերթ ենթակառուցվածքներում, կարևորագույն հանրային ծառայությունների բարելավումը և ավելի մեծ տարածաշրջանային համագործակցության և ինտեգրման խրախուսումը:

Հատկանշական է, որ տարիներ շարունակ ԱԶԲ-ն տարբեր երկրներում՝ այդ թվում նաև Հայաստանում,  բազմաթիվ ծրագրեր է ֆինանսավորել, բայց դրանց հետ կապված բազում խնդիրներ են ի հայտ եկել։

Հարցին՝ արդյոք կա՞ն երաշխիքներ, որ հիմա ԱԶԲ-ի հետ համագործակցության այս նոր ռազմավարությունն արդյունավետ է լինելու և  ֆինանսական միջոցներն իսկապես իրենց նպատակին են ծառայելու, Միքայել Մելքումյանը պատասխանեց․

«Նախկին փորձը  ցույց է տալիս, որ  որևէ բան բացառել չի կարելի, սակայն միևնույն ժամանակ կարծում եմ, որ եթե  այդ ռազմավարությունը   հաստատվել  է, ապա սա նշանակում է՝ որոշակի ազդակներ կան, որ ծրագրի իրականացման ռիսկերն ինչ-որ չափով նվազել են։ Հետագայի համար՝ իրավապայմանագրային հարաբերությունների կոնտեքստում, կան, իհարկե,  շատ լուծումներ, որոնք պետք է կիրառենք, բայց այս պահի դրությամբ՝ կրկնում եմ, եթե գումարները տրամադրում են, ուրեմն պետք է դրանցից օգտվել։ Մենք, ի վերջո, պիտի հասկանանք, որ կապիտալ ծախսերի իրականացման  տեսանկյունից՝ մեզանում պետք է ձևավորվի  կատարյալին մոտ համակարգ, հատկապես այն դեպքում, երբ այն հին, նախահեղափոխական պայմաններն այլևս չկան»։

 

Մանրամասները՝ տեսանյութում։

  • Դիտումներ՝ *