Տարօրինակ հրաժարականի մասին է հայտարարել կոռուպցիայի կանխարգելման նորաստեղծ հանձնաժողովի անդամ Էդգար Շաթիրյանը: Նա հայտարարել է, որ հրաժարականի պատճառը իր հանդեպ հանձնաժողովի հինգ անդամից երեքի բացարձակ անվստահությունն է: Կոռուպցիայի կանխարգելման նորաստեղծ հանձնաժողովի նախագահ է ընտրվել «Լուսավոր Հայաստան»-ի ներկայացուցիչ Հայկուհի Հարությունյանը: Այլ կերպ ասած՝ կոռուպցիայի կանխարգելման հանձնաժողովի նախագահ է դարձել ընդդիմության ներկայացուցիչը:
Թեմայի շուրջ «Առաջին լրատվական»-ի հետ քննարկմանը մասնակցեցին Երևանի մամուլի ակումբի նախագահ Բորիս Նավասարդյանը, պատգամավոր Սոս Ավետիսյանը և քաղաքագետ Արմեն Վարդանյանը: Քննարկման մասնակիցների դիտարկմամբ՝ իշխանությունը խորհելու տեղ ունի. կոռուպցիայի կանխարգելման հանձնաժողովի շուրջ աղմուկը մտահոգիչ է:
Նորաստեղծ հանձնաժողովի անդամի հրաժարականը, այն էլ հանձնաժողովի ստեղծման մեկնարկին, ի՞նչ հարցեր է առաջացնում. այս հարցին ի պատասխան՝ Սոս Ավետիսյանը նշեց, որ հիմնականում չհասկացված է մնում հրաժարականի հարցը: «Խմբակցությունը առաջադրել էր Շաթիրյանի թեկնածությունը, և անկախ հանձնաժողովի քվեարկությունից, պետք չէր նեղացկոտություն ունենալ և ասել՝ ինձ չեն վստահում: Նորմալ է, որ ընդդիմադիր կուսակցությունների ներկայացուցիչները կարող էին դեմ քվեարկել: Պարտադիր չէ, որ քաղաքական մեծամասնության կողմից պատվիրակված ներկայացուցիչը հանձնաժողովի նախագահ դառնա: Հակակոռուպցիոն մարմնի անդամն էլ նույն լիազորություններն ունի»,- նշեց պատգամավորը:
Բորիս Նավասարդյանը հավելեց, որ ստեղծված իրավիճակը մի շարք հարցեր է առաջացնում. «Նախ՝ ինչո՞ւ էր իշխող քաղաքական ուժը առաջադրում մի թեկնածուի, որը հեղինակություն չունի կամ քիչ հեղինակություն ունի մյուսների մոտ, երկրորդ՝ իշխող քաղաքական ուժն ինչո՞ւ է առաջադրում մի թեկնածուի, որը մինչ այդ աշխատել է ՀՀԿ-ի կողմից ձևավորված Էթիկայի հանձնաժողովում: Միակ հետևությունն այն է, որ իշխող քաղաքական ուժը ի սկզբանե պատրաստ էր նախագահի տեղը զիջել ընդդիմության թեկնածուին»:
Բորիս Նավասարդյանի խոսքով՝ Հակակոռուպցիոն հանձնաժողովի նախագահի ընտրությունից մեծ ողբերգություն պետք չէ սարքել: Նրա դիտարկմամբ՝ նորաստեղծ հակակոռուպցիոն մարմնից սպասելիքները մեծ են. «Սպասում ենք, որ այդ հանձնաժողովը կարդարացնի բոլոր ակնկալիքները»:
Արմեն Վարդանյանը նույնպես կարծիք հայտնեց, որ հանձնաժողովից ակնկալիքները մեծ են. «Մանավանդ որ հանձնաժողովի նախագահը վայելում է քաղաքացիական հասարակության և ընդդիմության հարգանքը, անառարկելի հեղինակություն և փայլուն կրթություն ունի… Այս հանձնաժողովի նախագահը ձևական ֆիգուր չի լինելու: Իշխանությունն այս քայլով ցույց տվեց, որ բավարար կամք ունի կոռուպցիայի դեմ լրջորեն պայքարելու համար: Կարծում եմ՝ այս հանձնաժողովին պետք է օժտել մեծ լիազորություններով՝ ընդհուպ մինչև օպերատիվ-հետախուզական հնարավորություններ, և ավելի մեծ արդյունքներ կլինեն»:
Քննարկման մասնակիցներն անդրադարձան նաև մեկ այլ հարցի, որը վերաբերում է ԱՄՆ Կոլումբիա դաշնային շրջանի՝ Հայոց ցեղասպանության ճանաչման մասին բանաձևի ընդունմանը:
Մանրամասն՝ տեսանյութում: