«Բորսան ինքնին շատ լավ է գործում որպես ենթակառուցվածք, քանի որ ունի շատ լավ, հստակ գրված խիստ կարգավորումներ Կենտրոնական բանկի կողմից ու նաև օրենքով է կարգավորվում: Միջին ներդրողը, քաղաքացիները միջնորդի հետ միշտ առնչվում են բորսայի միջոցով: Այսինքն՝ բորսան մասնագիտացած միջնորդների, մասնագիտացած ներդրումային ծառայություն մատուցող ըկերությունների համար ստեղծված հարթակ է»,- «Առաջին լրատվական»-ի հետ զրույցում նշեց Հայաստանի ֆոնդային բորսայի գլխավոր տնօրեն Հայկ Եգանյանը:
Նրա խոսքով՝ քաղաքացիները բորսային ծառայություն ավելի շատ ստանում են բրոքերների միջոցով. «Այդ ինստիտուտը կայացած է, բանկային համակարգը ևս, փառք Աստծու, ամենակայացած ինստիտուտն է, ներդրումայիններն էլ կան, բայց գուցե իրենց ստրատեգիայի մեջ դեռևս չի մտնում քաղաքացիներին ներգրավելը. հուսով ենք, որ շուտով երևի իրենք էլ կակտիվանան»:
Մեր զրուցակիցը նշեց, որ իրենց բորսան ավելի շատ շրջանառում է պարտատոմսեր, քան բաժնետոմսեր. «Կա պարտատոմսեր թողարկող ավելի քան 20 ընկերություն, որոնք հիմնականում ֆինանսական բանկային համակարգի ընկերություններն են՝ բանկեր, վարկայիններ, բայց ամենալավ լուրն այն է, որ արդեն 2019 թվականից սկսած՝ ոչ ֆինանսական համակարգի 3 ընկերություններ նույնպես թողարկեցին պարտատոմսեր: Դա նշանակում է, որ բիզնեսը փորձում է ներգրավել պարտքային գումարներ հենց հանրությունից, և ավելի ոգևորիչ է այն երևույթը, որ հանրությունը ակտիվ մասնակցում է: Այսինքն՝ հանրությունը վստահում է նրանց և պարտքով գումար է տալիս»:
Հայկ Եգանյանը նշեց, որ բաժնետոմսերի շուկան, սակայն, շատ զարգացած չէ, ինչն ունի բազմաթիվ պատճառներ:
Հարցազրույցն ամբողջությամբ՝ տեսանյութում: