«Ես մանրամասներին չեմ տիրապետում, բայց կարծում եմ, որ լրագրողների փոխայցերին կհետևեն նաև այլ փոխայցեր: Կան փոխայցեր, թե ոչ, ես տեղյակ չեմ: Քանի որ նման տեղեկատվություն կար, երեկ ես փորձեցի նաև ԱԳՆ նախարար Զոհրաբ Մնացականյանից ճշտել: Նա նշեց, որ այս պահին դեռ այդպիսի բանակցություններ չկան: Բայց, այնուհանդերձ, եթե իսկապես այն, ինչ հրապարակվել է, իրականություն է, այստեղ զարմանալի ոչինչ չկա: Եթե Դուք հետևեք Ստրասբուրգում ադրբեջանցի պատվիրակների ելույթներին, ապա կտեսնեք, որ շատ դեպքերում նրանց ելույթների «մեխը» ես եմ»,-«Առաջին լրատվական»-ի հետ զրույցում ասաց ԱԺ ԲՀԿ խմբակցության պատգամավոր Նաիրա Զոհրաբյանը:
Անդրադառնալով ադրբեջանցի ԵԽԽՎ պատվիրակ Ռաֆայել Հուսեյնովի՝ իր հասցեին հնչեցրած մտքերին, պատամավորը նշեց.«Դե Ռաֆայել Հուսեյնովը ակնհայտ հոգեբույժի կարիք ունի: Մեկ անգամ չէ, որ ինձ անվանել է նացիոնալիստ, անգամ իրենց Ստրասբուրգի խորհրդարանից հնչեցրել է «նացիոնալիստ օձ»: Իհարկե կարող էի դիմել էթիկայի հանձնաժողով, բայց ինձ թույլ չտվեցի: Կարծում եմ՝ նա առողջական խնդիրներ ունի և իր հայտարարություններին լուրջ վերաբերել հնարավոր չէ»: