Թավշյա հեղափոխությունից հետո նախկին իշխող համակարգի ներկայացուցիչները վարչապետ Փաշինյանին պարբերաբար մեղադրում էին այն բանում, որ նա Լևոն Տեր-Պետրոսյանի «նախագիծն» է և փորձում է վերարտադրել նրա քաղաքականությունը: Միաժամանակ Լևոն Տեր-Պետրոսյանի թիմի ներկայացուցիչներն էլ մեղադրանք հնչեցրին Փաշինյանի հասցեին, երբ նա քաղաքական գնահատականի շրջանակ սահմանեց նաև 1996 թվականը:
Իսկ թե ինչու ներառվեց 1996 թվականը ևս՝ քաղտեխնոլոգ Վիգեն Հակոբյանը «Առաջին լրատվական»-ի հետ զրույցում ասաց. «Հենց թեկուզ այն պատճառով, որ Փաշինյանին անընդհատ կապում են առաջին նախագահի և նրա շրջապատի հետ: Երկրորդ պատճառն այն է, որ այսօրվա իշխանության ձևաչափը բավականին բազմավեկտոր է, այսինքն՝ ստեղծվել է հետհեղափոխական սկզբունքով, և յուրաքանչյուր քաղաքական ուժ, որը այս կամ այն չափով մասնակցել է հեղափոխական պրոցեսին և իր մասնաբաժինն է ստացել իշխանության մեջ, ունի տարբեր գաղափարախոսություններ, ծագումնաբանություններ և նույնիսկ նպատակներ: Եվ այս ուժերի միջև այս կամ այն խնդրի շուրջ վաղ թե ուշ պետք է ձևավորվեին տարաձայնություններ: Նաև կարծում եմ, որ իշխանության ներսում էլ տարբեր թևերի միջև կա մրցակցություն, թե ով է ավելի ուժեղ ազդեցություն ունենալու Փաշինյանի մոտ»:
Քաղտեխնոլոգի կարծիքով՝ Փաշինյանը ժամանակ առ ժամանակ փորձում է համոզել հանրությանը կամ քաղաքական շրջանակներին, որ ինքը լիովին զերծ է մնում որևէ ազդեցությունից կամ փորձում է բալանսի բերել այդ ազդեցությունները. «Ես չեմ բացառում, որ հիմա ներքին, այսպես ասած, մրցակցություն էր սկսվել, և գուցե տերպետրոսյանական այդ թիմը իր պահանջներն ավելի էր խստացնում, և Փաշինյանը բաց չի թողել պատեհ առիթը իր վերաբերմունքը ցույց տալու»:
«Ժողովրդավարական համախմբում» նախաձեռնության համահիմնադիր, քաղաքագետ Սուրեն Պետրոսյանն էլ կարծում է, որ պարզելու համար, թե որքանով է Նիկոլ Փաշինյանը տերպետրոսյանական ծրագիր, պետք է համադրել նրանց երկուսի տեսլականները. «Եթե կարող ենք ինչ-որ չափով գնահատական տալ և հնարավորինս սահմանել, թե որն է առաջին նախագահի ռազմավարությունը և պետության տեսլականը, ապա Նիկոլ Փաշինյանի դեպքում, ցավոք, դա անել չենք կարող»:
Նրա խոսքով՝ Հայաստանում առկա դիսկուրսը ցավալիորեն ցածրագույն մակարդակի վրա է. «Ոչ ոք չի խոսում գաղափարների, տեսլականների մասին, խոսում են, թե այս մարդը ում «պրոյեկտն է», այն մարդը՝ ում: Մենք պետք է սրանից անցում կատարենք այս ոլորապտույտից դուրս գալու համար»:
Հարցազրույցն ամբողջությամբ՝ տեսանյութում: