Լուրեր
Այդ նույն մարդը ժամանակին խոսում էր ռեցեսիայի ահագնացող միտումների մասին. պատգամավորը հակադարձում է Բագրատյանին
  • 09:30
  • 2019-11-27
  • Դիտումներ՝ *

Մենք ամեն ամիս տնտեսական ցուցանիշների համատեքստում սկսում ենք քննարկել այս կամ այն անձի գրառումը, որ տնտեսական աճի ցուցանիշները կեղծ են, փչոցի են, բայց այդ նույն թվերի վրա հենվում ենք օրինակ նույն մաքսազերծման, գյուղոլորտի ցուցանիշների նվազման դեպքում։ Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր, տնտեսագետ Արտակ Մանուկյանը։

Նշենք, որ նախկին վարչապետ Հրանտ Բագրատյանն էր արնդրադարձել նրան, որ այս տաևվա 10 ամիսների տվյալներով Հայաստանում գտանցվել է տնտեսական ակտիվության ցուցանիշի 7,1 տոկոս աճ։ Նա նշել էր, որ բեռնաշրջանառությունը 2 անգամ պակասել է, ինչի պայմաններում հնարավոր չէ գրանցել այդքան աճ։

Արտակ Մանուկյանն այս առնչությամբ նշեց. «Այդ տողերի հեղինակն ասում է, որ 2020 թվականին չեն լինելու այն նույն մաքսատուրքերը, որոնք գեներացվում էին այս տարի ավտոմեքենաների մաքսազերծումից։ Բայց այդ ֆոնին 2020 թվականի հարկային մուտքերի ավելացում է կանխատեսվում։ Սա ինչ է, եթե ոչ ստվերի դեմ արդյունավետ պայքար։

Կարելի է կամայական ինչ-որ բան վերցնել, օրվա թեմա դարձնել և սկսել դրա վերաբերյալ գնահատականներ տալ։ Մեկին խաշի թեման է հետաքրքրում, թե ինչպես են ծնունդ նշում՝ մոռանալով, որ նախկինում 1000 դոլարանոց շամպայններ էին բացում այդ թվում նաև հարկատուների հաշվին։ Այդպես ամեն մեկն իր ուղղությունից կախված տարբեր գրառումներ կարող է անել»։

Դիտարկմանը, որ ըստ Բագրատյանի աճի տեմպն իջել է, հոկտեմբերին սեպտեմբերի համեմատ տնտեսությունն անկում է ապրել, «Իմ քայլի» պատգամավորն ասաց. «Այդ նույն մարդը ժամանակին խոսում էր ռեցեսիայի ահագնացող միտումների մասին, հիմա ասում է, որ 7,5 տոկոս աճից 7,1 տոկոս է դարձել, դա նվազում է։ Այս տարվա համար նախատեսված էր 4,9 տոկոս տնտեսական աճ, սակայն ակնհայտ է, որ ունենալու ենք 6,5-7 տոկոս միջակայքում տնտեսական աճ։ Նաև ակնհայտ է, որ մենք ավելի արագ տեմպերով ենք աճում, քան մեր հարևան երկրները»

  • Դիտումներ՝ *