Հայկական ֆուտբոլում այսօր իրավիճակն այնպիսին է, որ ՀՖՖ նախագահի հավանական թեկնածուները կարծես թե ներկայանում են որպես փրկիչներ: Ավելի ստույգ՝ ով իրեն տեսնում է ՀՖՖ նախագահի պաշտոնում, իր առաքելությունն է համարում ֆուտբոլը անդունդից հանելը, կործանումից փրկելը: Փորձենք հասկանալ, սակայն, իրականում անդունդի որ հատվածում ենք գտնվում, և ինչը պետք է լինի ՀՖՖ նոր նախագահի աշխատանքի առանցքում:
ՀՖՖ վերջին երկու նախագահները ընտրություններից առաջ հայտարարել էին, որ գլխավոր նպատակը մանկապատանեկան ֆուտբոլը զարգացնելն է և մարզաձևն էլ ավելի մասսայական դարձնելը: Ու փաստորեն 2002 թվականին ՀՖՖ-ն զարգացնում է մանկապատանեկան ֆուտբոլը: 17տարվա ընթացքում այս ուղղությամբ կատարված միակ նշանակալի քայլը թերևս իսպանացի մասնագետների ներգրավումն էր: Հիշեցնենք, որ այս տարվա սկզբին հանրահայտ մասնագետ Խինես Մելենդեսը նշանակվեց ՀՖՖ տեխնիկական տնօրեն: Այսօր նրա մշակած ծրագրով փորձ է արվում առաջ շարժվել: Զարգացման հստակ մոդելի ներդրումը կարելի է բացառիկ համարել հայկական ֆուտբոլի պատմության մեջ:
Կարող ենք ասել, որ մանկապատանեկան ֆուտբոլի զարգացման ուղին ընտրված է, և միանշանակ է, որ այդ ուղուց շեղվելը ամենևին էլ ճիշտ չի լինի: Արձանագրենք, որ այսօր կա զարգացման ֆունդամենտը, և անհրաժեշտ է միայն հնարավորինս զարկ տալ ընթացքին: Ուստի ՀՖՖ նոր նախագահի ծրագրի առանցքում մանկապատանեկան ֆուտբոլի զարգացման թեզի առկայությունը ուղղակի անլուրջ կլինի:
Ժամանակը ցույց տվեց, որ գոյություն ունի շատ ավելի կարևոր սուբյեկտ, որն ըստ էության վճռորոշ է լինում ՀՖՖ նախագահների ճակատագրի հարցում: Խոսքը Հայաստանի ազգային հավաքականի մասին է: Հայաստանի ֆուտբոլի ֆեդերացիայի նախկին երկու նախագահները շարունակ հայտարարում էին, որ ազգային թիմի ելույթներով չի կարելի գնահատել ֆուտբոլային գերատեսչության և վերջինիս նախագահի աշխատանքը: Այս կերպ թե՛ Վանեցյանը և թե՛ Հայրապետյանը փորձում էին ապահովագրել իրենց հետագա աշխատանքը երկրի գլխավոր թիմի ձախողման դեպքում, բայց… Հասարակությունը չի ներում ազգային թիմի ձախողումները: Գուցե դա ճիշտ չէ, բայց հասարակության ընկալման մեջ ազգային հավաքականն ասոցացվում է ֆուտբոլի ֆեդերացիայի հետ: Վստահ ենք՝ եթե Հայաստանի ազգային հավաքականը նվաճեր 2020 թվականի Եվրոպայի առաջնության ուղեգիր, անկախ բոլոր բացթողումներից՝ Վանեցյանը կհերոսացվեր: Փառահեղ գնահատականի կարժանանար նաև ֆուտբոլի ֆեդերացիայի ընդհանուր աշխատանքը: Սա է իրականությունը:
«Եթե աշխարհի 2018 թվականի առաջնության առաջիկա ընտրական փուլին Հայաստանի հավաքականը ձախողի, ես հրաժարական կտամ: Երբեք չեմ ասել, որ շրջափուլի չստացվելու դեպքում կհեռանամ, բայց այժմ ասում եմ: Ավելին ասեմ՝ եթե ՖԱՖ-ը մի փոքր դադար տար, ես հրաժարական կտայի: Ուղղակի ինձ թասիբի են գցել. պետք է աշխատեմ»,- նշել էր Հայրապետյանը: Վերջինս այս հայտարարությամբ ըստ էության արձանագրել էր, որ ֆուտբոլասերների շարքերում ֆուտբոլի ֆեդերացիայի աշխատանքի գլխավոր ինդիկատորն ազգային թիմն է:
2018 թվականի աշխարհի առաջնության ընտրական փուլում Հայաստանի հավաքականը ձախողվեց, և Հայրապետյանի հրաժարականի հարցը դարձավ օրակարգային: Կրկին հիշենք, որ յուրաքանչյուր ձախողումից հետո Հայրապետյանը հայտարարում էր, որ ֆուտբոլի ֆեդերացիայի աշխատանքը չի կարելի գնահատել միայն ազգային թիմի մրցելույթներով: Խոստովանենք, որ ազգային հավաքականը ֆուտբոլի ֆեդերացիայի աշխատանքի չափելու միակ միավորը չէ: Միևնույն ժամանակ, սակայն, ազգային հավաքականը այն գործոնն է, որը գտնվում է հասարակության լայն շերտերի ուշադրության կենտրոնում: Կամա թե ակամա ազգային հավաքականի հաջողությունները կամ անհաջողությունները վերագրվում են ֆուտբոլի ֆեդերացիային և, մասնավորապես, այս կառույցի նախագահին:
Ովքե՞ր են պատասխանատու ազգային հավաքականի ձախողման համար. ֆուտբոլիստները, մարզիչները, ՀՖՖ-ն և վերջապես՝ ՀՖՖ նախագահը: Հենց վերջինս է նշանակում ազգային հավաքականի գլխավոր մարզիչ, որը ընտրում է այն ֆուտբոլիստներին, որոնք պատրաստ են երկիր ներկայացնել: Պատասխանատվության այս շղթան կարելի է համարել աքսիոմա:
Ինչ պետք է այս ամենից եզրակացնել: ՀՖՖ նախագահի թեկնածուները արդեն այսօրվանից պետք է ներկայացնեն ուժեղ ազգային հավաքական ունենալու իրենց տեսլականը: Նույնիսկ կարելի է ներկայացնել այն գլխավոր մարզիչների անունները, որոնց թեկնածուները տեսնում են ազգային թիմի ղեկին: Առջևում Ազգային լիգայի հերթական խաղարկությունն է, որին հաջորդելու է արդեն 2022 թվականի աշխարհի առաջնության ընտրական փուլը: Կարևոր է հասկանալ՝ ինչպես են թեկնածուները պատկերացնում այս մրցաշարերում Հայաստանի հավաքականի դերը, և ինչ խնդիրներն են իրագործելի:
Հիշեցնենք, որ Հայաստանի ֆուտբոլի ֆեդերացիայի նախագահի և գործկոմի նոր կազմի ընտրությունները կայանալու են այս տարվա դեկտեմբերի 23-ին: