«Պարզվում է՝ Երևանի քաղաքապետարանի օրեր առաջ կայացրած որոշումը, որ մարզերից Երևան եկող երթուղային տաքսիներն ու ավտոբուսները, իբր «քաղաքի ծանրաբեռնված երթևեկությունը թեթևացնելու» նպատակով, այսուհետ չեն հասնի Երևանի կենտրոն, ոչ բոլոր գծատերերն են «բանի տեղ դրել»:
Մասնավորապես Մասիսի հարակից մի քանի գյուղերը սպասարկող Երևան- Անդրանիկավան երթուղու մեծ ավտոբուսները, որի գծատերը Երկրապահ կամավորական միության (ԵԿՄ) նախագահ գեներալ Մանվել Գրիգորյանն է, երեկ ողջ օրը շարունակում էին նախկին երթուղով աշխատել՝ հասնելով մինչև «Այրարատ» կինոթատրոնի տարածք: Ավտոբուսի վարորդներից մի քանիսն էլ մեզ հետ զրույցում ասացին, որ ոչ մի խոչընդոտ չի եղել, և իրավապահ մարմինները ո՛չ եկել, ո՛չ էլ զգուշացրել են այդտեղ չկայանելու մասին, ինչպես դա անում էին նախօրեին մյուս երթուղագծերի միկրոավտոբուսների և ավտոբուսների դեպքում»,- գրում է «Հրապարակ»-ը և հավելում.
«Քաղաքապետականի սույն որոշման կապակցությամբ այլ հարցեր էլ են ծագում՝ ենթադրենք որոշումն իրավացի է, բայց որքանո՞վ է օրինաչափ այն, որ մարզային տրանսպորտի ուղեվարձերը մնալու են անփոփոխ, այն դեպքում, երբ կրճատվել են երթուղու կիլոմետրերը, քանի որ մարզային տրանսպորտը հասնում է մինչև մայրաքաղաքի արվարձաններ, սակայն ուղևորները ստիպված են լինելու երկրորդ տրանսպորտ փոխել և կրկին վճարել»:
