ԱԺ ՀՀԿ խմբակցության նախկին պատգամավոր, նախկին գլխավոր դատախազ Գևորգ Կոստանյանը Մարտի 1-ի գործով ներգրավվել է որպես մեղադրյալ: Մի քանի կայքեր կապ են հաստատել այս պահին ՌԴ-ում գտնվող նախկին գլխավոր դատախազի հետ՝ խնդրելով նրան մեկնաբանել ՀՔԾ որոշումը: «Ես և՛ իրենց հետ պայմանավորվածությամբ, և՛ բազմիցս էլ հրապարակային ասել եմ, որ անպայման վերադառնալու եմ ու նաև ասել եմ այս պահին չվերադառնալուս պատճառը: Ասել եմ, որ դասերի եմ, ու երբ սեսիան ավարտվի, գալու եմ»,- ասել է Գևորգ Կոստանյանը:
Վերջինս, սակայն, չգիտի, թե ինչո՞վ են պայմանավորված այս արհեստականությունն ու հրատապությունը, եթե ինքը նրանց ասել է, որ դասընթացն ավարտվելուն պես անպայման գալու է: «Իմ ամբողջ խնդիրն այն է, որ ես գիտեմ, որ եթե ես այս պահին գամ, ինձ առնվազն թույլ չեն տալու, որ ես հետ գամ, այդ պատճառով էլ կգամ այն ժամանակ, երբ կավարտեմ ընթացիկ դասընթացը: Այո, ես պատկերացնում եմ, որ առնվազն հիմա իմ գալու դեպքում իմ՝ երկրից դուրս գալու իրավունքը սահմանափակվելու է, հետևաբար դրա համար եմ ուզում կատարել պարտավորություններս ու հետո նոր վերադառնալ»,- եզրափակել է նախկին գլխավոր դատախազ Գևորգ Կոստանյանը:
Հարցազրույցի բովանդակությունը կասկած չի թողնում, որ Գևորգ Կոստանյանը Հայաստան չի վերադառնալու, ու Ռուսաստանի դատախազության ակադեմիայում նրա դասախոսությունն ընդամենը պատրվակ է։ Առնվազն տարակուսելի է, որ պրոֆեսիոնալ իրավաբանը պատշաճում է խոսել Ռուսաստանի դատախազության ակադեմիայի հանդեպ իր պարտավորության մասին, սակայն մոռանում է, որ յուրաքանչյուր օրինապաշտ քաղաքացի առաջին հերթին պարտականություններ ունի սեփական երկրի, նրա օրենքների հանդեպ։
Ակնհայտ է, որ Գևորգ Կոստանյանի դրվագը Մարտի 1-ի գործում առանցքային է, ու նրա հարցաքննությունը լույս է սփռելու այն հանգամանքների վրա, որոնք թույլ կտան հասկանալ, թե ինչ ծավալի կեղծիքներ են կատարվել այս գործում՝ գլխիվայր շուռ տալով փաստերը։ Առնվազն ակներև է, որ Կոստանյանը գործել է Սերժ Սարգսյանի հրահանգով, ու կանխատեսելի է, որ նախկին գլխավոր դատախազի ցուցմունքները կարող են ճանապարհ բացել նաև Սերժ Սարգսյանին մեղադրանք առաջադրելու համար։ Մյուս կողմից՝ Կոստանյանի ջանքերով վերացվել են ապացույցներ, որոնք փաստորեն Մարտի 1-ի գործում «մաքրել» են Ռոբերտ Քոչարյանի «հետքերը», ու եթե նա դա արել է Սերժ Սարգսյանի հանձնարարությամբ, ապա նախկին գլխավոր դատախազը դառնում է այն օղակներից մեկը, որը Մարտի 1-ի գործում ընդհանրական հանցագործ օրակարգ է ձևավորում Ռոբերտ Քոչարյան-Սերժ Սարգսյան զույգի համար։
Այս պարագայում, իհարկե, ակնհայտ է մեկ այլ հանգամանք։ Կոստանյանը Մոսկվայում չի թաքնվում, այլ բացահայտորեն ասում է, որ դասավանդում է Ռուսաստանի դատախազության ակադեմիայում, ըստ այդմ՝ եթե Մոսկվան ցանկություն ունենա, ապա Հայաստանի նախկին գլխավոր դատախազին կարող է արտահանձնել րոպեների ընթացքում։ Կոստանյանի ինքնավստահությունը, սակայն, մտավախություններ է ծնում, որ Ռուսաստանի իշխանություններն «ատամներով» պահելու են Մարտի 1-ի գործով հերթական մեղադրյալին՝ Մոսկվան դարձնելով այս հանցագործության մեղադրյալների «հավաքակայան»։