Airbus ընկերությունը ցանկանում է երկարատև թռիչքներ իրականացնող ինքնաթիռների համար չվող սագերի թռիչքների նման թռիչքի տեխնոլոգիա ներդնել, հաղորդում է Avianews-ը:
Ինչպես հայտնի է, չվող սագերը երամներով թռչում են V տառի ձևով, ինչը հնարավորություն է տալիս էներգիա խնայել երկարատև թռիչքների ժամանակ: Դա պայմանավորված է նրանով, որ երամի առաջնորդի հետևում դեպի վեր բարձրացող օդի հոսանք է առաջանում, ինչը թույլ է տալիս նրա ետևից թռչող թռչուններին մնալ օդում՝ դրա համար ավելի քիչ էներգիա ծախսելով:
Airbus-ը մտադիր է այդ փորձի վրա հիմնված տեխնոլոգիա ներդնել ինքնաթիռների թռիչքների համար fello’fly նախագծի շրջանակում, որը նախատեսում է օդանավերի զույգերով թռիչքներ:
«Նախնական հաշվարկները ցույց են տվել, որ նման թռիչքի դեպքում երկրորդ ինքնաթիռը կկարողանա նվազեցնել շարժիչի մղումը, ինչը կհանգեցնի վառելիքի սպառման 5-10 տոկոսով կրճատմանը»,- ասվում է հաղորդագրությունում:
Նշվում է, որ զույգերով թռիչքների դեպքում օդաչուների կողմից ավելի մեծ վերահսկողություն կպահանջվի, քանի որ նրանք պետք է վերահսկեն միմյանցից համեմատաբար կարճ հեռավորության վրա թռչող ինքնաթիռները՝ ցանկալի արդյունք ստանալու համար:
Ընկերությունը մտադիր է fallo’fly նախագծով գործնական փորձարկումներ իրականացնել արդեն 2020-ին՝ ներառելով երկու A350 ինքնաթիռներ: Airbus-ն ակնկալում է, որ տեխնոլոգիան գործնական կիրառություն կստանա հաջորդ տասնամյակի կեսերին:
