«Սերժ Սարգսյանի խոսքը լսելիս կարող է թյուր կարծիք ստեղծվել, թե մենք կարճ հիշողության հետ գործ ունենք։ Իրականում, հիշողության խնդիր չկա, մենք գործ ունենք անթաքույց ցինիզմի հետ»,- «Առաջին լրատվական»-ի հետ զրույցում ասաց իրավապաշտպան Վարդան Հարությունյանը՝ անդրադառնալով նոյեմբերի 20–ին Զագրեբում ընթացող ԵԺԿ համաժողովում ՀՀ 3-րդ նախագահ, ՀՀԿ նախագահ Սերժ Սարգսյանի ելույթին։
Իր ելույթում Սերժ Սարգսյանը մասնավորապես ասել է. «Հեղափոխության անվան տակ իշխանության եկածները իրականության մեջ անցած մեկուկես տարվա ընթացքում որևէ հեղափոխական փոփոխություն կամ երկրի արտաքին ու ներքին օրակարգերի հեղափոխական բեկում չեն մտցրել:
Ավելին` երկրում ժողովրդավարությանն սպառնացող վտանգավոր զարգացումներ են տեղի ունենում: Խաթարվել են սահմանադրականության հիմքերը։ Չի գործում իշխանությունների տարանջատման և հավասարակշռության սկզբունքը։ Բազմաթիվ փաստերով ակնհայտ խախտված է դատական իշխանության անկախությունը։ Իրականացվում են քաղաքական հետապնդումներ:
Պարբերական են դարձել ընդդիմադիր լրատվամիջոցների և ակտիվիստների նկատմամբ ագրեսիվ գործողությունները, անհանդուրժողականությունը և ատելության խոսքը հասել են մտահոգիչ չափերի: Անցյալ տարի ես հեռացա, որպեսզի իմ ժողովուրդը փորձի է՛լ ավելի լավ պետություն կառուցել»:
«Իր հագով, սեփական իշխանությունը երկարաձգելու նպատակով սահմանադրական փոփոխություններ իրականացրած, սահմանադրական հանրաքվեի արդյունքները կեղծած մարդը խոսում է սահմանադրականության հիմքերից։ Իշխանության բոլոր թևերը սեփական ձեռքերում կենտրոնացրած մարդը խոսում է իշխանությունների տարանջատման մասին։ Դատարաններն իր անձնական ենթակայության և իր աշխատակազմի ենթակայության տակ դրած մարդը խոսում է դատական իշխանության անկախությունից։ Հարյուրավոր քաղբանտարկյալների կալանավայրերում պահած մարդը, 2008 թ․մարտի 1-ի հեղված արյամբ իշխանության եկած մարդը խոսում է քաղաքական հետապնդումներից։ Երկրում ժողովրդավարական ինստիտուտները վերացրած, իր ու իր ընտանիքի բարեկեցությունը երկրի շահերից անհամեմատ վեր դասած մարդը խոսում է ժողովրդավարությանն սպառնացող վտանգից։ Մենք իսկապես գործ ունենք անթաքույց ցինիզմի հետ»,- հակադարձեց իրավապաշտպանը։
Վարդան Հարությունյանի խոսքերով՝ առաջին հայացքից թվում է, թե Սերժ Սարգսյանը չպետք է կարողանար նման ելույթ ունենալ։ Խիստ թարմ են հիշողությունները։ Բոլորն ամեն ինչ գիտեն։ Գիտի նաև ինքը։ Բայց խոսում է։ «Խոսում է, որովհետեւ ինչպես չի հարգել, այնպես էլ շարունակում է չհարգել այս պետությանը և այս ժողովրդին՝ իրեն այդքան միահամուռ մերժած ու մերժող ժողովրդին։ Խոսում է նաև այն պատճառով, որ 2018-ի հեղափոխությունը, որը պետք է իրերն իրենց անուններով կոչեր, երևույթներին իր հստակ գնահատականը տար ու այդ գնահատականից ելնող հետևություններ ու գործողություններ կատարեր՝ հապաղում է։ Խոսում է, որովհետեւ չի հնչել իր ռեժիմի և իր պաշտոնավարման տարիների քաղաքական գնահատականը։ Որովհետև գործած ավերվածությունների, կազմակերպած քաղաքական հետապնդումների, անօրինականությունների, մարդկանց ունեզրկման, իշխանությունը ուզուրպացնելու համար դեռ իրեն հաշիվ չի ներկայացվել»,- ընդգծեց Հարությունյանը։