Նոյեմբերի 6-ից ԿԳՄՍ նախարարության դիմաց նախարար Արայիկ Հարությունյանի հրաժարականի պահանջով մեկնարկած շուրջօրյա ցույցերը դադարեցվում են․ երեկ հրավիրված մամուլի ասուլիսի ժամանակ հայտարարել են երիտասարդ դաշնակցականները: Նրանք այս պահին Եվրոպայում գտնվող նախարարին առաջարկել են Հայաստան վերադառնալուն պես հրապարակային հանդիպում-քննարկում կազմակերպել նախարարության դիմաց բոլոր շահագրգիռ կողմերի մասնակցությամբ:
«Մենք պատրաստ ենք հանդիպել Արայիկ Հարությունյանի հետ։ Հրաժարականի պահանջն ուժի մեջ է մինչև այլ հայտարարություն չլինի», – ասել է ՀՅԴ ՀԵՄ կենտրոնական վարչության անդամ Քրիստինե Վարդանյանը:
Ֆորմալիստական հարթության վրա ՀՅԴ ԵՄ-ի տարածած հայտարարությունը նույնիսկ ռացիոնալ է, որովհետև երկխոսությունը պետք է վարել՝ հրաժարվելով շանատաժի մարտավարությունից, սակայն նույնիսկ անզեն աչքով տեսանելի է, որ Դաշնակցությունը գոնե մասամբ խմբագրում է իր կոշտ հռետորաբանությունը։ Օրինակ՝ օրեր առաջ ավանդական կուսակցության ներկայացուցիչներն, իրար հերթ չտալով, հայտարարում էին, որ նստացույցի ու երկխոսության օրակարգերը ոչ միայն չեն հակադրվում, այլ միմյանց փոխլրացնում են։ Տեսանելի է նաև, որ ՀՅԴ-ն սկսեց նահանջել, երբ հանդիպեց գործող իշխանությունների կոշտ քաղաքական գանհատականներին, այլ խոսքով՝ մղվեց հին համակարգի գիրկը։
Եթե ավելի անկեղծ լինենք, ապա խնդիրը հենց դա է՝ ՀՅԴ նախաձեռնած շարժումն այդպես էլ չդարձավ ուսանողական, առավել ևս՝ զանգվածային։ Ու այս համատեքստում խիստ օրինաչափ է նստացույցի դադարեցումը․ դա ոչ թե մարտավարության փոխոխություն է, այլ ՀՅԴ սպառված լիմիտի դրսևորում, այլ խոսքով՝ տուն գնաց ոչ թե Արայիկ Հարությունյանը, ում հրաժարակը պահանջում էին մի քանի տասնյակ ուսանողներ, այլ նախարարի փոխարեն՝ տուն գնացին դաշնակցականները, որոնք որևէ կրեատիվ ասելիք չունեին ու, ի վերջո, իրենց երիտասարդների միջոցով գեներացրած լոկալ շարժումն ամբողջովին տեղավորեցին հեղափոխության ու ռևանշիզմի հակադրության հարթություն՝ դիրքավորվելով հին համակարգի շարքերում։
Ըստ էության՝ երեկ ոչ թե ուսանողական նստացույց է դարարեցվել, այլ արձանագրվել է հին համակարգի հեթական դիրքային պարտությունը։ Պատահական չէ, որ այդ փաստը տեղի է ունեցել Բրյուսելում գտնվող Արայիկ Հարությունյանի քաղաքական դիպուկ հայտարարության համատեքստում։
ՀՅԴ Բելգիայի երիտասարդական միությունը երեկ Բրյուսելում բողոքի ակցիա է իրականացրել ԿԳՄՍ նախարար Արայիկ Հարությունյանի կատարած այցի ընթացքում։ «Արայի՛կ, հեռացի՛ր» վանկարկումներով և «Կա միայն մեկ դաշնակցություն» պաստառներով ցուցարարները պահանջել են նախարարի հրաժարականը: «Մարտի 1-ը եղել է ձեր իշխանության օրոք, եղե՞լ է: Հոկտեմբերի 27-ը եղել է ձեր իշխանության ժամանակ: Կրթական համակարգում ամենամեծ կոռուպցիան եղել է ձեր օրոք»,- երիտասարդներին հակադարձել է նախարարը՝ թերևս հասկացնելով, թե ում հեռանալու ժամանակն է։
Լուսանկարը՝ Armeniasputnik-ի