Նախագահ Դոնալդ Թրամփը հայտարարել է, որ ռուսական հետաքննության մասին ԱՄՆ արդարադատության նախարարության հրապարակվելիք հաշվետվությունը կլինի «պատմական»: Նախագահն այդ մասին ասել է Fox News-ին տված հարցազրույցի ընթացքում:
Թրամփը պատմել է արդարադատության նախարարության գլխավոր տեսուչ Մայքլ Գորովիցի հաշվետվության մասին, որն ուսումնասիրում է, թե ինչպես է Հետաքննությունների դաշնային բյուրոն պահպանել «Օտարերկրյա լրտեսության նկատմամբ հսկողության» մասին օրենքի պահանջները ռուսական հետաքննության ժամանակ, որը մեկնարկել էր 2016 թ.-ին նախագահական նախընտրական քարոզարշավի ժամանակ:
«Ասում են, որ հաշվետվությունը պատմական է»,- ասել է Թրամփը՝ հրաժարվելով ներկայացնել մանրամասներ, հաղորդում է «Գոլոս Ամերիկի»-ն:
Նախատեսվում է, որ հաշվետվությունը կհրապարակվի դեկտեմբերի 9-ին:
«Այսպիսով, ենթադրում եմ, որ այն, ինչ դուք կտեսնեք, հավանաբար կլինի խոշորագույն սկանդալը մեր երկրի պատմության մեջ»,-շարունակել է նախագահը՝ պատմելով, որ նա հանձնարարել է ղեկավարել հետաքննությունը գլխավոր դատախազ Ուիլյամ Բարրին:
«Եվ եթե դա պատմական զեկույց է, ապա դուք ինչ-որ բան կիմանաք: Եվ այդժամ, հնարավոր է, որ խոսքը կվերաբերի քրեական գործին»,-ասել է Դոնալդ Թրամփը:
Նախագահը բազմիցս մեղադրել է Օբամայի վարչակազմի բարձրաստիճան աշխատակիցներին նրանում, որ վերջիններս թույլ են տվել «լրտեսել» Թրամփի նախընտրական գրասենյակը 2016 թ.-ի քարոզարշավի ընթացքում:
Գլխավոր տեսուչ Գորովիցն արդեն կես տարվա ընթացքում հետաքննում է ենթադրյալ խախտումները, որոնք վերաբերում են իրականացված հետապնդումների հրամաններին: Արդարադատության նախարարությունն ու ՀԴԲ-ն 2016 թ.-ին ստացել էին թույլտվություն Թրամփի նախկին խորհրդական Քարթեր Փեյջին հետևելու համար: Ներկայումս հայտնի չէ, թե թույլատրել է արդյոք դատարանը հետևել Թրամփի նախընտրական շտաբի մյուս աշխատակիցներին, թե ոչ: