«Արցախ ՀԷԿ» բաց բաժնետիրական ընկերությունը հանդիսանում է Արցախի Հանրապետության հիդրոէլեկտրաէներգիա արտադրող խոշորագույն ընկերությունը։ Այն հիմնադրվել է 2007թ-ին՝ Արցախի կառավարության ջանքերով, ինչն էլ նպաստել է Արցախում էլեկտրաէներգիայի արտադրության ծավալների ավելացմանը։ Ներկայումս ընկերությունը էլեկտրաէներգիայի արտադրությունն իրականացնում է մեկ խոշոր «Սարսանգ ՀԷԿ»-ի և 7 փոքր հիդրոէլեկտրակայանների միջոցով։ Ընկերության հիմնական ակտիվը Սարսանգի հիդրոէլեկտրակայանն է, որը կառուցվել է 1976թ-ին Արցախի հիմնական գետի` Թարթառի վրա։ «Սարսանգ ՀԷԿ»-ը հագեցած է երկու հիդրոտուրբիններով` յուրաքանչյուրը 25 ՄՎտ դրվածքային հզորությամբ և վայրկյանում 33.2 խորանարդ մետր ջրի օգտագործման ծավալներով:
«Սարսանգ ՀԷԿ»-ի պետ Գրիգոր Գրիգորյանի տեղեկացմամբ՝ մասնավորապես այս հիդրոէլեկտրակայանը շահագործումից մինչ այսօր հանդիսանում է Արցախն էլեկտրաէներգիայով ապահովող հիմնական աղբյուրը՝ ընդհանուր 50 ՄՎտ հզորությամբ։
«2009թ-ից ընկերության կանոնադրական կապիտալը կրկնապատկվել է՝ 5 միլիարդ 100 միլիոն ՀՀ դրամից դառնալով 11 միլիարդ 537 միլիոն ՀՀ դրամ։ Կուտակված այս գումարն ու ներգրավված բանկային միջոցները «Արցախ ՀԷԿ» ընկերությունն ուղղեց նոր ՀԷԿ-երի կառուցմանը։ Այդպիսով այս 12 տարվա ընթացքում ավելացան ևս 7 համեմատաբար փոքր ՀԷԿ-եր՝ 2010թ-ին «Թրղի-1»՝ 3 ՄՎտ հզորությամբ, 2011թ-ին՝ «Թրղի-2»՝ 6 ՄՎտ հզորությամբ, 2012թ-ին՝ «Մատաղիս-1»՝ 4․8 ՄՎտ և «Մատաղիս-2»՝ 3 ՄՎտ հզորություններով, 2015թ-ին՝ «Թրղի-3»՝ 5 ՄՎտ հզորությամբ , 2018թ-ին՝ «Թրղի-4»՝ 0․8 ՄՎտ և «Լև-1»՝ 7 ՄՎտ հզորություններով»,- նշեց Գրիգոր Գրիգորյանը։
«Արցախ ՀԷԿ» ընկերությունը ներկայումս ունի 230 աշխատակից՝ ամսական միջինը 210 հազար դրամ աշխատավարձով։
«Արցախ ՀԷԿ» ընկերության ֆինանսական տնօրեն Ժան Հովհաննիսյանն էլ իր հերթին հավելեց, որ «Արցախ ՀԷԿ»-ն այսօրվա դրությամբ ապահովում է Արցախի Հանրապետության էլեկտրաէներգիայի պահանջարկի 54 %-ը, իսկ մնացած 46 %-ն ապահովվում է այլ կազմակերպությունների կողմից կառուցված փոքր ՀԷԿ-երի միջոցով։
Մանրամասները՝ տեսանյութում։
