Լուրեր
Վանեցյանը վտանգավոր խաղի մեջ է մտնում. նա կարող է հայտնվել Քոչարյանի կարգավիճակում

Այսօր տեղեկություն ստացվեց այն մասին, որ Ռուսաստանում ձերբակալվել է Լևոն Սարգսյանը՝ Ալրաղացի Լյովը, որը Հայաստանի նախկին իշխող համակարգում հայտնի դեմքերից էր, աղմկոտ մի շարք պատմությունների մասնակից: Լևոն Սարգսյանին ձերբակալել են ռուսական Զելենոգրադ քաղաքում: Նրան մեղադրում են Մաքսային կոմիտեի նախկին պետ Արմեն Ավետիսյանի տան վրա հարձակումը կազմակերպելու համար:

Լևոն Սարգսյանի անունը շրջանառվել է նաև մարտիմեկյան դեպքերի համատեքստում: Նրա անունը կար, օրինակ, հայտնի ցուցակում, որ կազմել էր փաստահավաք խումբը: Այնտեղ օլիգարխների անուններ էին, որոնց թիկնազորերը մասնակցել են մարտիմեկյան գործողություններին՝ ստանալով զենք և իրավապահների հանդերձանք:

 

Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբաններ Հակոբ Բադալյանը, Աղասի Մարգարյանը և քաղաքագետ Հայկ Սահակյանը:

 

Ըստ հաղորդագրության՝ հետախուզման մեջ գտնվող Լևոն Սարգսյանը հայտնաբերվել և ձերբակալվել է ՀՀ ոստիկանության քրեական հետախուզության գլխավոր վարչության, Ռուսաստանում Հայաստանի ոստիկանության ներկայացուցչության և ՌԴ ՆԳՆ համապատասխան ստորաբաժանումների համատեղ իրականացված լայնածավալ օպերատիվ-որոնողական աշխատանքի արդյունքում: Անդրադառբալով այս դիտարկմանը Հակոբ Բադալյանը նշեց. «Տեսնենք՝ արդյոք համագործակցությունը կշարունակվի մինչև արտահանձնում, թե կընդհատվի արտահանձնման փուլում: Ունենք նախադեպ՝ Քեթրինի Միհրանի նախադեպը»:

«Ալրաղացի Լյովի ձերբակալությունը մարտիմեկյան գործում պետք է որ ճակատագրական չլինի: Ամեն դեպքում ցանկացած անձ, ով կհայտնաբերվի դրսում, պետք է պատասխան տա իրեն ուղղված հարցերի:

Եթե մարտիմեկյան գործով զբաղվող իրավապահները մնացել են Ալրաղացի Լյովի հույսին, ապա առաջանում են հարցեր իրավապահների աշխատանքի հետ կապված: Եթե ընդհանրապես կան բարդություններ գործի քննության առումով, այստեղ Ալրաղացի Լյովն էլ չի փրկի»,- նշեց վերլուծաբանը:

 

Հայկ Սահակյանի դիտարկմամբ՝ Ռուսաստանն ամենևին էլ շահագրգռված չէ, որ մարտիմեկյան գործում հասնենք արդարության, նախկին իշխանությունները պատժվեն և իրականությունը դուրս գա ջրի երես. «Կարծում եմ՝ Ռուսաստանի կողմից կլինեն շահարկման փորձեր»:

Աղասի Մարգարյանի կարծիքով՝ գուցեև պետք չէ ենթատեքստեր փնտրել, հնարավոր է, որ պարզապես հայ և ռուս իրավապահ մարմինների համատեղ ջանքերի արդյունքում ձերբակալվել է հետախուզման մեջ գտնվող անձը՝ Լևոն Սարգսյանը:

Հակոբ Բադալյանի դիտարկմամբ՝ Լևոն Սարգսյանի ձերբակալության հանգամանքը քաղաքական տեսանկյունից ուշագրավ է այն ֆոնին, որ նա Սերժ Սարգսյանի մերձավոր օլիգարխներից էր, և նրա ձերբակալությունը հաջորդեց ԵԺԿ համագումարում Ս. Սարգսյանի ելույթին, որը քաղաքական հայտ էր եվրոպական տիրույթում: «Ս. Սարգսյանը հանդիպել էր նաև ԱՄՆ դեսպանին, և նրա այդ շարժը դեպի Արևմուտք ֆոն է ստեղծում ՌԴ-ից ստացված այդ ձերբակալության մասին տեղեկության առումով: Հաշվի առնելով այս իրողությունները՝ գուցե այստեղ կարելի է տեսնել որոշակի տողատակ. Ալրաղացի Լյովի ձերբակալությունը գուցե Մոսկվայից զգուշացում էր Սերժ Սարգսյանին: Հստակ է, որ եթե Ռուսաստանը չցանկանար, Լևոն Սարգսյանը չէր ձերբակալվի:

Մանրամասն՝ տեսանյութում:

  • Դիտումներ՝ *