Թուրքիայի և Ղրիմի միջև լաստանավային հաղորդակցությունը, որը դադարեցվել էր 2017 թվականին, վերականգնվել է: Լաստանավերը շաբաթական մեկ անգամ կերթևեկեն Սև ծովի Կերչ և Զոնգուլդաք նավահանգիստների միջև, նոյեմբերի 22-ին հայտնել է «Արտահանման աջակցման հարավային տարածաշրջանային կենտրոն» ինքնավար ոչ առևտրային կազմակերպության տնօրեն Նատալյա Սերովան՝ տեղեկացնում է TASS-ը։
«Այժմ ստացա հաստատում, որ մեզ մոտ գործարկվել է Զոնգուլդաք – Կերչ լաստանավը, շաբաթական մեկ անգամ կանոնավոր մատակարարումներ»,- ասել է նա հանրապետության Տնտեսական քաղաքականության, արդյունաբերության և ձեռնարկչության զարգացման պետական խորհրդի կոմիտեի նիստում:
2014 թվականին անցկացված հանրաքվեից և Ռուսաստանի հետ Ղրիմի և Սևաստոպոլի վերամիավորումից հետո Ուկրաինան և այլ երկրներ պատժամիջոցներ սահմանեցին Ռուսաստանի, ռուսաստանցի գործարարների և քաղաքական գործիչների, Ղրիմ այցելած մարդկանց և այն ընկերությունների դեմ, որոնք գործարարություն են վարում թերակղզում: 2017 թվականի հոկտեմբերին Թուրքիայի իշխանությունները որոշում կայացրեցին չընդունել այն նավերը, որոնք ժամանում են Ղրիմի նավահանգիստներից: Արգելքը վերաբերում էր ցանկացած դրոշի ներքո նավարկող նավերին։