Վերլուծաբանների, լրատվամիջոցների ուշադրության կենտրոնում է հայտնվել Սերժ Սարգսյանի ելույթը ԵԺԿ համագումարում: Նախ ուշագրավն այն է, որ Սարգսյանն իր հրաժարականից մեկուկես տարի անց հայտնվում է եվրոպական ամբիոնում և բաց չի թողնում այդ պահը: Դա արդեն խոսուն հանգամանք է և վկայում է այն մասին, որ Ս. Սարգսյանն ունեցել է և տեսել է դրա անհրաժեշտությունը:
Ինչու է Սերժ Սարգսյանն իր հրաժարականից մեկուկես տարի անց փորձել օգտագործել եվրոպական ամբիոնի հնարավորությունը: Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Գոռ Մադոյանը, քաղաքագետներ Ռուբեն Մեհրաբյանը և Արմեն Հովհաննիսյանը:
Նախկին նախագահը հայտարարել էր, որ եկել է քաղաքացու հետ խոսելու պահը, բայց նա նախընտրեց եվրոպական ամբիոնը: Արմեն Հովհաննիսյանը, անդրադառնալով այս դիտարկմանը, նշեց. «Շատ դժվար է պատկերացնել, որ Սերժ Սարգսյանը կարող է խոսել քաղաքացու հետ՝ հաշվի առնելով քաղաքացու հետ նրա հարաբերությունների պատմությունը, քաղաքացու հանդեպ նրա վերաբերմունքը և քաղաքականության և պետականության մասին նրա պատկերացումները: Ս. Սարգսյանի իշխանության 10 տարիները հիմնված էին այն բացարձակ համոզմունքի վրա, որ բնակչության մեծ մասը ոչ իրազեկ մարդիկ են, որոնք իրենց ոչ սրտացավությամբ ի վիճակի չեն ներազդելու քաղաքական գործընթացների վրա և մասնակցել կառավարմանը, և իրենց պարտքն էր այդ մարդկանց հեռու պահել իշխանությունից, որոշումների ընդունումից, նույնիսկ ընտրական գործընթացից: Դժվար է պատկերացնել այդ աստիճան ոչ դեմոկրատ մարդու երկխոսությունը հասարակության հետ: Իրենք սովոր են վերնախավային պայմանավորվածությունների, ինտրիգների և իրենց խոսքը հղել դրսին»:
Քաղաքագետը նաև ընդգծեց, որ Ս. Սարգսյանը ՀՀ քաղաքացուն ասելիք չունի, և քաղաքացին էլ նրա հետ խոսելիք չունի, և Ս. Սարգսյանն ընտրում է ամբիոններ, որտեղ կարող է մտքեր հնչեցնել՝ առանց անմիջականորեն շփվելու ՀՀ քաղաքացիների հետ:
Գոռ Մադոյանի դիտարկմամբ՝ Ս. Սարգսյանը երբեք չի ներկայացել որպես հանրային քաղաքական գործիչ, միշտ կուլիսային դերակատար է եղել: «Դա իր համար միշտ շատ ավելի կոմֆորտ զոնա է եղել: ՀԺԿ ամբիոնից հնչեցրած նրա հայտարարություններն ուղղված էին հայաստանյան ազդեցիկ խմբերին, բայց դրսի ամբիոնից… Հետաքրքիրն այն էր, որ, ըստ էության, Ս. Սարգսյանը դիրքավորվում էր որպես հեղափոխության շարունակության, հեղափոխության արժեքների պահպանման ջատագովներից մեկը»,- նշեց վերլուծաբանը:
Ռուբեն Մեհրաբյանի խոսքով՝ Սերժ Սարգսյանի ճառը՝ եվրոպական լսարանի առաջ, ուղղված էր նրան, որ նա փորձի իրեն որոշակի դերակատարում վերապահել այս փոփոխությունների ֆոնին. «Դա է ամենաշատը սարսափեցնում այսօր»:
Քաղաքագետը նաև ընդգծեց, որ Ս. Սարգսյանի ելույթը կարծես վերջին ճիչն էր. «Նա առաջին անգամ չէ, որ այս մեկուկես տարվա ընթացքում փորձում է ԵԺԿ-ի սլաքներն ուղղել դեպի Հայաստան…»:
Մանրամասն՝ տեսանյութում: