Sotheby’s աճուրդի տունը վաճառքից հանել է բրիտանացի փողոցային նկարիչ Բենքսիի՝ 1 միլիոն ֆունտ (1,3 միլիոն դոլար) գնահատման արժեքով The Drinker կոչվող քանդակը, դրա գողացված լինելու վերաբերյալ պնդումներից հետո: Նոյեմբերի 20-ին այդ մասին հայտնել է The Guardian թերթը։
Նկարիչ Էնդի Լինքն ավելի վաղ հայարարել է, որ իրեն համարում է 180 սանտիմետր բարձրությամբ քանդակի օրինական տերը, որն իր պարտեզից գողացել են մի քանի տարի առաջ, որտեղ նա այն բերել էր փողոցից: Սկզբնապես Բենքսին այդ գործը 2004 թվականին թողել էր ոչ մեծ հրապարակում՝ Լոնդոնի կենտրոնի Շաֆթսբերի ավենյուից ոչ հեռու:
Այն ծաղրապատճենում է Օգյուստ Ռոդենի ամենահայտնի քանդակներից մեկը՝ «Մտածողը», որի վրա ֆրանսիացի վարպետն աշխատել է 1880 – 1882 թվականներին:
Արձանի «գողությունից» հետո Լինքը կապվել է Բենքսիի հետ և նրանից 5 հազար ֆունտի (6,5 հազար դոլարի) փրկագին պահանջել քանդակի վերադարձման համար:
Անանուն նկարիչն ի պատասխան նրան առաջարկել է 2 ֆունտ (2,5 դոլար), որպեսզի մեկ կանիստր բենզին գնի և այրի «Գինեմոլին»:
Արդյունքում քանդակն այդպես էլ մնացել է Լինքի պարտեզում, քանի դեռ այն այնտեղից չեն տարել անհայտ անձինք: Sotheby’s-ը նշել է, որ Բենքսիի գործն աճուրդից հետ կանչելու որոշումը կապված չէ Լինքի պնդման հետ, ըստ որում անհայտ է մնում, թե աճուրդի տունը երբ կկարողանա կրկին վաճառքի հանել այդ լոտը։