«Այս միջնորդություններն ընդհանրապես չպետք է շարունակվեն: Ինչ սկսվել է դատավարությունը, միայն լսում ենք Ռոբերտ Քոչարյանի պաշտպանների տարբեր, սակայն նույնաբովանդակ միջնորդությունները: Անվերջ չեն կարող շարունակվել Ռոբերտ Քոչարյանի խափանման միջոցը փոխելու միջնորդությունները, և դատարանը պետք է սկսի դատաքննությունը»,- «Առաջին լրատվական»-ի հետ զրույցում ասաց փաստաբան Արա Ղարագյոզյանը՝ անդրադառնալով Մարտի 1-ի գործին:
ՀԱԿ իրավական հանձնաժողովի ներկայացուցիչ Արմեն Խաչատրյանն էլ կարծում է, որ դատարանը մի կողմից՝ պարտավոր է դատավարական ֆորմալ ընթացակարգերը պահպանել, մյուս կողմից՝ պետք է հասկանալ, որ պաշտպանական կողմը փորձում է արհեստականորեն ձգձգել գործի քննության սկիզբը. «Ես կարծում եմ, որ տիկին Դանիբեկյանը պետք է ավելի ճկուն լինի և, օգտվելով Քրեական դատավարության օրենսգրքով իրեն տրված լիազորություններից, սահմանափակի այդ միջնորդությունները ներկայացնելը: Ես կարծում եմ, որ դատարանը կոնկրետ գործողություններով գործը պետք է մտցնի դատաքննության փուլ, պետք է հրապարակվի մեղադրական եզրակացությունը, որից հետո սկսվի գործի ըստ էության քննությունը»:
Արմեն Խաչատրյանի խոսքով՝ եթե Հրայր Թովմասյանի կանտորան նոր սյուրպրիզներ չմատուցի, տիկին Դանիբեկյանը շատ արագ կհաղթահարի այս, այսպես ասած, ճգնաժամը, և գործը կմտնի դատաքննության փուլ:
Նախկին քաղհալածյալ Մուրադ Գրիգորյանն էլ նկատեց, որ առողջ տրամաբանությամբ առաջնորդվելու դեպքում Ռոբերտ Քոչարյանն ու նրա պաշտպանական թիմը պետք է շահագրգռված լինեին դատաքննությունը արագ սկսելու, իրենց անմեղությունը ապացուցելու, իրենց ակնկալած դատավճռին արագ հասնելու գործում. «Սակայն անզեն աչքով էլ նկատելի է, որ նրանք ամեն ինչ անում են դատավարությունը ձգձգելու համար: Իսկ սա հստակ հուշում է այն բանի մասին, որ իրենց ձեռնտու չեն հրապարակային դատաքննությունը, մեղադրական եզրակացության հրապարակումը: Նրանք ամեն ինչ անում են հատուցման պահը հետաձգելու համար»:
Հարցազրույցն ամբողջությամբ՝ տեսանյութում: