«Սասնա ծռեր» կուսակցությունը Ամուլսարի խնդրի վերաբերյալ հայտարարություն է տարածել, որում ասվում է, որ Ամուլսարի հարցը լուծված է, իսկ այն վերաբացելու դեպքում կլուծվի այս իշխանության հարցը։ Փաստորեն այս հայտարարությամբ կառավարությանը վերջնագիր է ներկայացնում քաղաքական մի ուժ, որը նախկին համակարգի հետ ոչ մի առնչություն չունի։ Մյուս կողմից՝ կասկած չկա, որ նախկին ուժերն Ամուլսարի հետ կապված հարցում կօգտագործեն այս առիթը և սատար կկանգնեն այս հայտարարությանը։
Ինչպես նաև, այս հայտարարությամբ «Սասնա ծռեր» կուսակցությունը քաղաքական կապիտալիզացիայի կարող է հետագայում վերածել այն՝ ասելով, որ իրենց այս վերջնագիրը նպաստեց, որ Ամուլսարը վերաբացվեց։ Ինչպիսի՞ն են ձեր դիտարկումներն այս հայտարարության շուրջ․ «Առաջին լրատվական»-ի հարցին քաղաքագետ, Եվրոպայի խորհրդի Քաղաքական դասընթացների երևանյան դպրոցի տնօրեն Արմեն Զաքարյանը պատասխանեց․ «Անկախ նրանից, Ամուլսարը կլիներ, թե որևէ այլ առիթ, շատ սպասելի է, որ Նիկոլ Փաշինյանին աջակցող «Սասնա ծռերը» որևէ ժամանակ հետո պետք է նրանից առանձնանան ու նույնիսկ, եթե հակոտնյա քաղաքական ուժ չդառնան, ապա պետք է դառնան առանձին քաղաքական ուժ, որովհետև, եթե իրենք ուզում են քաղաքական հաջողություն ունենան, հավակնություններ ունենան հանրության մեջ, ապա պետք է սեպարատ գործունեության անցնեն։ Խորհրդարանական ընտրություններից հետո «Սասնա ծռերի» ներկայությանն այնքան էլ նկատելի չէր։ Հիմա նրանք երևի թե նկատի են առնում, որ պետք է սկսեն հետևողական քաղաքական աշխատանքը, և այս հայտարարությունը կարելի է դիտարկել այդ առումով։
Ինչ վերաբերում է Ամուլսարին, ապա պետք է ասեմ, որ Ամուլսարի ապագան դեռևս անհայտ է, որովհետև անկախ նրանից, թե ինչ քաղաքական զարգացումներ են Հայաստանում Ամուլսարի շուրջ, միջազգային բորսաները չեն հավատում Ամուլսարի վերագործարկմանը։ Այսինքն՝ այն արժեթղթերը, որ «Լիդիանը» ուներ Ամուլսարի հետ կապված, արժեթղթային բորսայում որևիցե շարժ չի դրսևորում։ «Սասնա ծռեր» կուսակցությունն իրենց քաղաքական գործունեության համար սա հարմար առիթ են նկատել, և հետագայում էլ կլինեն նման առիթներ։ Մինչև այսօր նրանք դիտարկվել են, որպես Նիկոլ Փաշինյանին աջակցող ուժ, և քաղաքական օրակարգեր ձևավորելու առումով դեմք չունեն։ Այսինքն՝ «Սասնա ծռեր» կուսակցությունը քաղաքականորեն մինչև այսօր իր դիմագիծը դեռ չի ձևավորել»։
Մանրամասները՝ տեսանյութում։
