«Անհամեմատ լավ գործեր են արվում հիմա: Ամենալավն այն է, որ իշխանության եկած մարդիկ չեն ասում մի բան, ենթադրում ուրիշ բան, մարդիկ ասում են այն, ինչ ուզում են անել: Իսկ նրանց քննադատների մի զգալի մասն ասում է մի բան, ենթադրում ուրիշ բան, բայց դրանից ժողովուրդն արդեն կշտացել է, դա այլևս հեռանկար չունի: Այս իշխանություններն ամենալավը չեն և երբեք իշխանություններն ամենալավը չեն կարող լինել, բայց այս իշխանություններն արդար են աշխատում: Սա ամենակարևորն է:
Արդարությունից հետո կարևոր պայման է նաև բարոյականությունը: Առաջին անգամ տեսնում ենք իշխանության եկած ուժեր, որոնք աշխատում են բարոյական սկզբունքներով և օրենքներով»,- այս մասին «Առաջին լրատվական»-ի հետ զրույցում ասաց Գերագույն խորհրդի և ԱԺ նախկին պատգամավոր Վիգեն Խաչատրյանը՝ հավելելով, որ իշխանությունը կարող է բարոյազրկվել, եթե հասարակությունը մի կողմ քաշվի և հրաշքների սպասի:
Մեր զրուցակիցը նաև հավելեց, որ այս իշխանությունը, ի տարբերություն նախորդների, գիտակցում է, որ իշխանությունը հասարակության ղեկավարը չէ, այլ պետք է ղեկավարի ոլորտներ, որոնք իրեն վստահվել է հասարակությունը:
«Մարդիկ, ովքեր դուրս են գալիս իշխանության դեմ, նրանք անելիք չունեն այս մթնոլորտում, ինչպես որ գորտն է ճահիճ ու հոտած մթնոլորտ սիրում: Այս մարդիկ չհասկացան, որ հասարակությունը մերժել է կառավարման նախկին ոճը»,- նշեց ԱԺ նախկին պատգամավորը:
Անդրադառնալով Հանրային խորհրդի նախկին նախագահ Վազգեն Մանուկյանի կողմից «Վերնատուն» ակումբի ստեղծմանը, մեր զրուցակիցը նշեց. «Եթե մի հարցի շուրջ նրանց ասես եկեք ընդհանուր հայտարարի, իրար կուտեն: Մարդիկ հարթակ են ստեծել, որ հարթակ վերացնեն, չի լինելու դա… Ինչ կարիք կա շարունակել կերակրատախտակի մասին երազելը: Պետք է կանգ առնել… … Նրանց պայքարը Նիկոլի դեմ չէ, այլ հասարակության դեմ է»:
Մանրամասն՝ տեսանյութում:
